O‘zbekistonda koronavirusga qarshi emlanganlar soni 600 ming kishidan oshdi

O‘zbekiston hududlari bo‘ylab 27-aprel kuni jami 34 445 kishi COVID-19’ga qarshi emlandi, deb xabar bermoqda Sog‘liqni saqlash vazirligi matbuot xizmati.

Shu tariqa ayni kungacha O‘zbekistonda koronavirus infeksiyasiga qarshi emlangan fuqarolar soni 600 379 nafarga yetdi.

27-aprel kunidagi emlash ko‘rsatkichlari bo‘yicha yuqori o‘rinlarni:

• Farg‘ona viloyati (5357 nafar);
• Toshkent viloyati (4235 nafar);
• Samarqand viloyati (4138 nafar) band qildi.

Ta’kidlanishicha, hozirga qadar jami emlanganlar soni bo‘yicha rekord ko‘rsatkich Farg‘ona viloyatida (80 873 nafar) qayd etilgan. Namangan viloyatida bu ko‘rsatkich 62 275 nafarni, Samarqand viloyatida esa 60 543 nafarni tashkil qilmoqda.

Eslatib o‘tamiz, Toshkentda 27-apreldan bog‘cha tarbiyachilari va maktab o‘qituvchilarini ZF-UZ-VAC 2001 vaksinasi bilan emlash boshlandi.

Ma’lumot uchun, O‘zbekistonda 1-apreldan 65 yoshdan katta shaxslar va tibbiyot xodimlarini koronavirusga qarshi o‘zbek-xitoy ZF-UZ-VAC2001 va AstraZeneca vaksinalari bilan emlash jarayoni boshlangan edi. 26-aprel holatiga ko‘ra, butun mamlakat bo‘yicha 565 mingdan ortiq fuqaro koronavirusga qarshi emlangan. Hukumat iyun oyi oxirigacha 4 millionga yaqin, yil oxirigacha 7 million aholini koronavirusga qarshi emlashni rejalashtirgan.