Namanganda 2021-yil birinchi choragida aliment to‘lashdan bo‘yin tovlagan 285 nafar shaxsga nisbatan sud qarorlari bilan ma’muriy qamoq tarzidagi jazo chorasi qo‘llangan. Bu haqda MIB viloyat boshqarmasi tomonidan o‘tkazilgan matbuot anjumanida ma’lum qilindi, deya xabar beradi “Daryo” muxbiri Azizbek Abduvaliyev.
Bu choradan keyin ham aliment to‘lamagani uchun 2 kishiga nisbatan jinoyat ishi qo‘zg‘atilgan. Aliment to‘lovidan qarzdorligi bo‘lgan 17 mingdan ortiq fuqaroning mamlakat hududidan chetga chiqishi vaqtincha cheklangan.
Matbuot anjumanida ta’kidlanishicha, viloyatda aliment to‘lovlarini o‘z vaqtida amalga oshirayotgan, hatto oldindan to‘lab qo‘yayotganlar ham bor. Xususan, 2021-yil birinchi choragida 172 ta aliment bilan bog‘liq ijro hujjati oldindan to‘lov amalga oshirilgani uchun ish yurituvidan tugatilgan.
“Pop tumanida istiqomat qiluvchi fuqaro Sh.N.dan sobiq turmush o‘rtog‘i N.M. foydasiga bir nafar farzandining moddiy ta’minoti uchun aliment undirish belgilangandi. Unga alimentni o‘z vaqtida to‘lab borish zarurligi tushuntirilgan va ogohlantirilgan. Biroq u bunga ma’suliyatsizlik bilan qarab, yuzaga kelgan qarzdorlikni bartaraf etmadi. Natijada byuroning Pop tuman bo‘lim davlat ijrochisi tomonidan to‘plangan hujjatlar sudga yuborildi. Bo‘lib o‘tgan sud jarayonida qarzdor otaga yana bir imkoniyat berildi. U bundan to‘g‘ri xulosa chiqardi va farzandi voyaga yetgunga qadar hisoblangan salkam 66 million so‘m o‘rniga 6300 AQSh dollarini bir yo‘la to‘lab berdi”, — deydi MIB viloyat boshqarmasi matbuot xizmati rahbari Sohibjon Rapiqov.
Matbuot anjumanida qayd etilishicha, Namangan viloyatida 2021-yil yanvar—mart oylarida jami 7 milliard 250 million so‘m aliment undirilib, egalariga yetkazilgan.
Izoh (0)