Namanganda xotinini muntazam ravishda qiynab, uni urib kelgan fuqaroga nisbatan jinoiy ish qo‘zg‘atildi. O‘zbekistonda zo‘ravonlikka qarshi “Sukut saqlama” loyihasida qayd etilishicha, er to‘yining ilk kunidan boshlab xotinini tizimli ravishda urib kelgan, keyin arqonda bog‘lab, ketmon dastasi singuncha kaltaklagan.
Viloyat IIB matbuot xizmatining ma’lum qilishicha, kelinning onasi M.K. To‘raqo‘rg‘on tumani IIB boshlig‘i nomiga ariza bilan murojaat qilib, unda kuyovi, To‘raqo‘rg‘on tumanida yashovchi A.X. qizi U.X.ni 2021-yil 12-aprel kuni rashk sababli urib, tan jarohati yetkazganini ma’lum qilib, kuyoviga nisbatan qonuniy chora ko‘rishni so‘ragan.
Viloyat prokuraturasi ma’lumotlariga ko‘ra, holat yuzasidan 14-aprel kuni tergovga qadar tekshiruv harakatlari boshlanib, U.X. tan jarohati olgani yuzasidan sudga oid tibbiy ekspertiza tayinlangan.
Sud tibbiy ekspertizasining 23-apreldagi xulosasida kelining tan jarohatlari ko‘krak qafasi orqa yuzasi chap va o‘ng tomonlarida to‘qima defekti bilan bo‘lgan yaralar borligi, ko‘krak qafasi old va orqa yuzalarida, yelka kamarida, har ikkala yelkalarida, bilaklarida, qo‘l kaftlarida, sonlarida teriosti gematomalar borligi, har ikkala ko‘z qovoqlarida, yuzida, ko‘krak qafasi old yuzasida, bosh tepa sohasida qontalashlar aniqlangan.
U.X. badanidagi tan jarohatlarining ayrimlari 10-15 sutka avval, ayrimlari 2-3 sutka oldin qattiq o‘tmas buyum ta’siridan, shuningdek, arqon ta’siridan ham kelib chiqqani inkor etilmagan.
Aniqlangan jarohatlar sog‘liqni qisqa vaqt — 6 kundan ko‘p 21 kundan kam bo‘lgan muddatga buzilishiga olib keladigan xususiyatga ega bo‘lgani uchun og‘irlik darajasiga ko‘ra, sog‘lig‘ining buzilishiga sababchi bo‘lgan yengil tan jarohatlari toifasiga kirishi ko‘rsatilgan.
Tergovga qadar tekshiruv davomida A.X. shar’iy turmush o‘rtog‘i U.X.ni rashk qilishi, unga ishonmasligi, muttasil uni qiynab, o‘zining yashash xonadonida urib, do‘pposlab kelishi aniqlangan.
“Sukut saqlama”ning yozishicha, kelinning qaynsinglisi ukasiga xotining erkaklar bilan gaplashadi, deb tuhmat qilgan. Arqonda bog‘lab, ketmon dastasi singuncha kaltaklangan kelin o‘lib qolmaslik uchun tuhmatni o‘z bo‘yniga olishga majbur bo‘lgan.
24-aprel kuni holat bo‘yicha To‘raqo‘rg‘on tuman IIB huzuridagi tergov bo‘linmasi tomonidan fuqaro A.X.ga nisbatan Jinoyat kodeksining 109-moddasi 2-qismi (qasddan badanga yengil shikast yetkazish) bilan jinoyat ishi qo‘zg‘atilgan. 27-aprel kuni esa A.X. Jinoyat kodeksining 109-moddasi 2-qismi va 110-moddasi 1-qismi (qiynash) bilan gumon qilinib, ushlangan.
Eslatib o‘tamiz, Milliy mass-mediani qo‘llab-quvvatlash va rivojlantirish jamoat fondi Vasiylik kengashi raisi o‘rinbosari, O‘zbekistonda gender tengligini ta’minlash komissiyasi a’zosi Saida Mirziyoyeva ayollarga nisbatan zo‘ravonlik mavzusidagi yangiliklar keyingi kunlarda umidsizlik zanjiriga bog‘lanib ketayotganini aytgandi. Uning fikricha, jamiyat razolat va sukut uchun, “ayolning o‘zi aybdor” degan qarash uchun juda og‘ir badal to‘layapti.
“Qonunlar bor. Hamma qonun oldida birdek javob berishi kerak. Ayollar va bolalarga nisbatan zo‘ravonlikni haqqoniy tergov qilish masalasi birlamchi vazifalar qatorida bo‘lishi shart. Jinoyatchilar jazo muqarrar ekanini bilsin!”, — degan edi u.
Mavzuga doir:
Izoh (0)