Kremlda Rossiya prezidenti Vladimir Putin va Belarus prezidenti Aleksandr Lukashenko o‘rtasida qariyb to‘rt soatlik muzokaralar bo‘lib o‘tdi. Bu haqda Rossiya prezidentining matbuot kotibi Dmitriy Peskov ma’lum qildi, deb yozadi Meduza.
Foto: “RIA-Novosti”
Ma’lum qilinishicha, uchrashuv uch soat 55 daqiqa davom etdi. Peskovning so‘zlariga ko‘ra, siyosatchilar mamlakatlar o‘rtasidagi iqtisodiyot, asosan sanoat, energetika, tibbiyot va yuqori texnologiyalar sohasidagi o‘zaro munosabatlarni muhokama qildi. “Bundan tashqari, biz tegishli idoralar orqali o‘tgan davrda hukumat darajasida amalga oshirilgan ishlarni sarhisob qildik”, — deb qo‘shimcha qildi Peskov.
Muzokaralar boshlanishidan oldin Lukashenko Belarus va Rossiya integratsiya bo‘yicha 26-27 yo‘l xaritalarini kelishib olgani haqida ma’lum qilgan edi. “Ko‘p narsa qolmadi, iqtisodiy xarakterga ega ikki-uchta o‘ta jiddiy dastur, xususan soliqqa tortish masalalari qolgan”, — deya qo‘shimcha qilgan edi Lukashenko.
Belarusda ekspertlar Kremlda bo‘lib o‘tgan muzokaralardan so‘ng, Putin va Lukashenko keyingi integratsiya to‘g‘risida, masalan, Belarusda Rossiya harbiy bazasini joylashtirish to‘g‘risida e’lon qilishi mumkin deb taxmin qilgan.
17-aprel kuni Lukashenko tez orada o‘zining “chorak asrlik prezidentligi davridagi asosiy qarorlaridan” birini e’lon qilishini ma’lum qilgan edi. U qanday qaror bo‘lishiga aniqlik kiritmagan.
Shu kuni Belarus Davlat xavfsizlik qo‘mitasi hokimiyatni egallashga urinish hamda Lukashenko va uning oila a’zolari hayotiga suiqasd qilishning oldi olingani to‘g‘risida xabar berdi. Moskvada FXX (Federal xavfsizlik xizmati) yordamida fitna ishtirokchisi deb gumon qilingan ikki kishi— Belarus siyosatshunosi Aleksandr Fedut va advokat Yuriy Zenkovich hibsga olingan. Lukashenkoning aytishicha, suiqasd ortida AQSh maxsus xizmatlari turgan.
AQSh Lukashenkoga nisbatan suiqasdga aloqasi borligini rad etdi.
21-aprel kuni Putin Federal Majlisga yillik murojaati chog‘ida , G‘arb davlatlari Lukashenkoga qarshi suiqasdni payqamaganini va qoralamaganini ta’kidladi.
