Belarus prezidenti Aleksandr Lukashenkoga suiqasd tayyorlashda AQShning ishtiroki borligi haqidagi xabarlar “mutlaqo yolg‘on”. Bu haqda AQSh Davlat departamenti vakilining so‘zlariga tayanib, “RBK” xabar berdi.

Foto: AP Photo

“Biz Rossiya davlat ommaviy axborot vositalarida Aleksandr Lukashenkoga qarshi fitna uyushtirilgani to‘g‘risidagi xabarlarni hamda Lukashenkoning bu haqdagi OAVda to‘g‘ridan-to‘g‘ri bayonotlarini ko‘rdik. Buning ortida AQSh hukumati turgan yoki Lukashenkoning o‘ldirilishiga urinish bo‘lgan, degan har qanday taxmin mutlaqo yolg‘ondir”, — dedi department vakili.

17-aprel kuni Lukashenka o‘zi va bolalarining hayotiga tahdid yaqinlashib kelayotgani haqida bayonot bergan. Prezidentning so‘zlariga ko‘ra, operatsiya Amerika maxsus xizmatlari tomonidan qo‘llab-quvvatlangan, ular esa o‘z navbatida AQSh “yuqori siyosiy rahbariyati” tomonidan buyurtma qilingan.

Shuningdek, respublika davlat xavfsizligi tergov bo‘limi boshlig‘i Konstantin Bychek ONT telekanalida AQSh fuqaroligiga ega belaruslik advokat Yuriy Zenkovich to‘ntarishning asosiy tashkilotchisi deb topilganini aytgan. “Olingan ma’lumotlarga ko‘ra, Zenkovich, AQSh razvedka xizmatlariga aloqador bo‘lgan. Belarus hududida u tekshiruvlar o‘tkazgan, amaldagi hukumatni zo‘rlik bilan ag‘darishda ishtirok etishga tayyor qurolli kuchlar va huquqni muhofaza qilish organlari harbiy xizmatchilarini pul mukofoti uchun yollashga va pora berishga uringan”, — dedi u.

Bychekning so‘zlariga ko‘ra, tergov bo‘limi Zenkovichning harbiylar va “boshqa terroristik guruhlar” a’zolari bilan uchrashuvlarini hujjatlashtirgan. “Biz yashirin operatsiyalar orqali harbiy xizmatchilarga noqonuniy pul mukofotlarini o‘tkazish bo‘yicha ikkita holatni qayd etdik”, — dedi u.

Undan tashqari, Lukashenkoning aytishicha, davlat to‘ntarishi va suiqasd uyushtirishda Belarus Xalq fronti muxolifat partiyasi rahbari Grigoriy Kastusev ham ishtirok etgan. Bir necha kun oldin Kostusev hibsga olingan va tergov izolyatoriga joylashtirilgan.

Belarusda jinoyat kodeksining 357-moddasi (fitna yoki konstitutsiyaga zid ravishda hokimiyatni egallashga qaratilgan boshqa harakatlar) bo‘yicha jinoiy ish qo‘zg‘atildi. Bychekning so‘zlariga ko‘ra, respublikada birinchi bor mazkur modda bo‘yicha jinoiy ish ochilgan. Ushbu moddaning 1-qismiga binoan jazo (hokimiyatni egallashga yoki odamlarning o‘limiga olib kelmagan fitna) sakkiz yildan 12 yilgacha ozodlikdan mahrum qilishni nazarda tutadi.

“AQShdan uchib kelgan ‘agentlar’ nihoyat Moskvada qo‘lga olindi”, — deb ta’kidladi Lukashenko. Uning bayonotidan so‘ng, Rossiya FXB Moskvada Zenkovichni va belaruslik Aleksandr Fedutni hibsga olgani haqida xabar bergan edi.  FXB ma’lumotlariga ko‘ra, ular shaharga AQSh hamda Polshadagi maslahatlashuvlardan keyin Belarus qurolli kuchlarining muxolifat tomonga o‘tgan generallari bilan uchrashish uchun kelgan. Ta’kidlanishicha, ular Belarusda “mahalliy va ukrainalik millatchilarni jalb qilgan holda ishlab chiqilgan rang-barang inqiloblar ssenariysi bo‘yicha” harbiy to‘ntarishni hamda Lukashenkoning hayotiga suiqasd qilishni rejalashtirishgan.

FXBning operativ kadrlari “Rossiya 1” telekanali tomonidan namoyish etildi. Xususan, ularda ba’zi Belarus generallari bilan uchrashuvda gumonlanuvchilar to‘ntarishdan keyin Belarus Polsha tajribasiga ko‘ra “o‘sib borayotgan demokratiya”ning inkubatoriga aylanishi kerakligini ta’kidlagani, aytilgan. “Chunki agar hozir saylovlar o‘tkazilsa, u holda Lukashenkoning o‘rniga uning o‘g‘li saylanadi. Va yana 25 yil davomida hech narsa o‘zgarmaydi”, — degan Zenkovich. Bundan tashqari, FXB ma’lumotlarida gumonlanuvchilar prezidentni lavozimidan chetlashtirish va uning mol-mulkini egallash rejalarini e’lon qilgani aytilgan.

O‘z navbatida, prezidetnlik saylovlarida Lukashenkoga yutqazgan, Belarus muxalifati yetakchisi Svetlana Tixanovskiy prezidentga yaqinlashib kelayotgan suiqasd va davlat to‘ntarishi haqidagi Belarus va AQSh fuqarolarini o‘ziga qaratgan xabarlarda rossiyaliklar va Belarus maxsus xizmatlari tomonidan uyushtirilgan provokatsiya alomatlari borligini ta’kidlagan.