Buxoro viloyati G‘ijduvon tumanida gaz quvuriga noqonuniy ravishda ulanib olgan korxona aniqlandi, deya xabar bermoqda Bosh prokuratura huzuridagi Departament matbuot xizmati.
Qayd etilishicha, Departamentning G‘ijduvon tuman bo‘limi tomonidan o‘tkazilgan tergovga qadar tekshiruvda “S.I.” MChJ tomonidan jamiyatga qarashli bo‘lgan ohak ishlab chiqarish sexi gaz quvuri yon qo‘shnisi bo‘lgan “X.F.” MChJga qarashli issiqxonaning gaz quvuriga yashirincha ulanganligi, shuningdek, o‘z navbatida “X.F.” MChJ tomonidan ham tabiiy gazdan noqonuniy foydalanganligi natijasida “Hududgaz Buxoro” filiali manfaatlariga jami 125 million so‘m zarar yetkazilganligi aniqlangan.
Mazkur holat yuzasidan Jinoyat kodeksining 185-2-moddasi (elektr, issiqlik energiyasi, gaz, vodoprovoddan foydalanish qoidalarini buzish) bilan jinoyat ishi qo‘zg‘atilib, tergov harakatlari o‘tkazilmoqda.
Bundan avval “Dang‘aratumangaz” bo‘limi sobiq rahbari gaz o‘g‘irlagan ohak ishlab chiqarish sexlaridan 642 million so‘m zararni undirmagani aniqlangani, Jizzaxdagi kuchli gumburlash ovozi gaz quvurining yorilishi oqibatida yuzaga kelgani ma’lum qilingani hamda Samarqandda gazga noqonuniy ulanib, davlatga 360 million so‘m zarar yetkazgan fuqarolarga jinoiy ish qo‘zg‘atilgani haqida xabar berilgandi.
Izoh (0)