Viloyat, tuman va shahar hokimlari 2021-yilda xizmatlar sohasida 59 trillion so‘mlik 42 mingta yangi loyihani amalga oshirish, 150 mingta yangi doimiy ish o‘rni yaratish bo‘yicha o‘z rejalarini belgilagan. Bu haqda Prezident Shavkat Mirziyoyev raisligida o‘tkazilgan videoselektor yig‘ilishida ta’kidlandi, deya xabar bermoqda “Daryo” muxbiri.
“Hokimlarning belgilagan rejalarini o‘zim birma-bir ko‘rib chiqdim. Ularning o‘ziga olgan marralari ushbu hududlar salohiyatidan ancha past. Misol uchun, Jizzax bor-yo‘g‘i 718 milliard so‘mlik loyihalarni shakllantirgan. Shu bilan birga, Qashqadaryo 1,6 trillion so‘mlik loyihalar amalga oshirishni belgilagan bo‘lib, bu aholisi qariyb 3 baravar kam bo‘lgan Sirdaryo rejasidan (2,1 trillion so‘m) 25 foizga past.
Xuddi shu kabi xizmatlar hajmi ancha past bo‘lgan Oltinsoy va Shahrisabz tumanlari hokimlarining takliflari mutlaqo qoniqarsiz. Oltinsoy tumanida atigi 107 ta (54 milliard so‘m) va Shahrisabz tumanida 64 ta (91 milliard so‘m) loyihalarni amalga oshirish belgilangan.
Shu bilan birga, Chirchiq shahar hokimi mehmonxona, restoran, akvapark, kinoteatr, sport va boshqa ko‘ngilochar obyektlar tashkil qilish orqali, jami xizmatlar hajmini kamida 3 trillion so‘mga yetkazishi kerak (hozirda 1,4 trillion so‘m).
Toshkent shahrida xizmatlar hajmini kamida 3 baravarga oshirish bo‘yicha barcha imkoniyatlar mavjud. Bosh vazir va Jahongir Ortiqxo‘jayev ikki hafta muddatda Toshkent shahrining 524 ta mahallasi kesimida xizmatlarni rivojlantirish dasturini qabul qiladi.
Bosh vazir Aripov shanba kuni Toshkent shahrida alohida majlis o‘tkazib, poytaxt tumanlari hokimlari va sektor rahbarlarining aniq vazifalari, ularning mas’uliyatini belgilab, poytaxtda xizmatlar sohasida kamida 50 mingta yangi doimiy ish o‘rinlari yaratish rejasini tumanbay va mahallabay taqsimlab va tasdiqlab berishi kerak”, – dedi Prezident.
Bundan avval Shavkat Mirziyoyev xizmat ko‘rsatish sohasiga mas’uliyatsizlik qilgan 27 nafar rahbar lavozimidan olinib, 54 nafariga intizomiy jazo berilganini hamda pandemiya davrida xizmat ko‘rsatish sohasidagi tadbirkorlarni qo‘llab-quvvatlash uchun 35 trillion so‘mlik ko‘mak berilgani hamda Milliy bank qoshida xizmatlarni rivojlantirish bo‘yicha loyiha-tahliliy markazi tashkil etilishi haqida ma’lum qilgandi.
Izoh (0)