Qoraqalpog‘istonda yonib ketgan qo‘y-echkilar voqeasi yuzasidan yangi tafsilotlar ma’lum qilindi

Qoraqalpog‘istonning Ellikqal’a tumanidagi qo‘rada 440 bosh qo‘y-qo‘zisi va echki-ulog‘i bilan yonib ketgani haqida xabar berilgan edi. Ellikqal’a tumani ichki ishlar bo‘limi voqea bo‘yicha yangi tafsilotlarni ma’lum qildi.

Unda aytilishicha, voqea 2021-yil 22-martdan 23-martga o‘tar kechasi yuz bergan, 1981-yilda tug‘ilgan Ahmad Niyazimbetovga tegishli Ellikqal’a ovuli hududidagi qumlik orasidagi do‘nglikda joylashgan, 1-1,5 metr balandlikdagi yog‘och va simlar bilan o‘ralgan qo‘ra ichida boqib kelinayotgan 250 bosh qo‘y-qo‘zi va echki-uloq yonib ketgan.

Holat yuzasidan olib borilgan tergovga qadar tekshiruv harakatlari davomida aniqlanishicha, o‘sha kuni fuqaro Ahmad Niyazimbetovga tegishli qo‘y va echkilarni boqib, ularga ko‘z-quloq bo‘lish Beruniy tumani “Ohunboboyev” OFY hududida yashovchi, 1955-yilda tug‘ilgan fuqaro Ongarov Umirzoqqa topshirilgan bo‘lib, o‘sha vaqtda u yong‘in kelib chiqqan qo‘radan, taxminan, 15-20 metr uzoqlikda joylashgan bino, ya’ni ko‘chma vagon ichida yolg‘iz o‘zi bo‘lgan.

Bundan tashqari, olib borilgan tergovga qadar tekshiruv harakatlari davomida voqea joyi ko‘zdan kechirilganida ushbu ko‘chma vagon ichkarisida o‘t yoqib, ko‘chma vagon ichkarisini isitish va ovqat pishirish uchun mo‘ljallangan o‘choq joylashgan bo‘lib, o‘sha kuni unda o‘t yoqilganligi aniqlangan.

Holat yuzasidan tayinlangan sud-kimyoviy ekspertizasi xulosasiga ko‘ra, u yerda neft mahsulotlarining izlariga xos bo‘lgan belgilar kuzatilmagan.

Hozirgi kunda mazkur holat yuzasidan tergovga qadar tekshiruv harakatlari olib borilayotgan bo‘lib, ushbu yong‘in kelib chiqqan qo‘ra va undagi qo‘y-echkilarning egasi bo‘lgan fuqaro Ahmad Niyazimbetovning yaqin qarindoshlari, uning do‘stlari, ushbu yong‘in kelib chiqqan qo‘raga yaqin masofada yashovchi fuqarolar hamda muqaddam sudlangan shaxslar bilan operativ surishtiruv ishlari olib borilmoqda.

Holat yuzasidan Ellikqal’a tumani IIB tomonidan O‘zbekiston Jinoyat kodeksining 173-moddasi (mulkni qasddan nobud qilish yoki unga zarar yetkazish) 2-qismi “v” bandi bilan jinoyat ishi qo‘zg‘atilgan.