Yevropada 2018 va 2020-yillar oralig‘ida Yevroittifoqqa kattalar kuzatuvisiz kelgan va jamoat nazorati ostida bo‘lgan 18 292 nafar qochqin bola bedarak yo‘qolgan. Bu masala Britaniyaning Guardian nashri va Niderlandiyaning VPRO teleradiokompaniyasi bilan hamkorlikda o‘tkazilgan Germaniya media kompaniyasining tadqiqotida muhokama qilindi, deb yozmoqda “Korrespondent.net”.
Yo‘qolgan bolalarning aksariyati Marokash, Jazoir va Eritreyadan qochqin sifatida kelgan.
Tadqiqotda ma’lum bo‘lishicha, Fransiya, Daniya va Ruminiya bu kabi ma’lumotlarni to‘plamaydi, Bolgariya hukumati esa mamlakatga kattalar bilan yoki yolg‘iz kelgan voyaga yetmaganlarni alohida ro‘yxatga olmaydi.
2018 va 2020-yillar oralig‘ida Germaniyada 7806 nafar voyaga yetmaganning yo‘qolgani haqida xabar berilgan, ularning 7082 nafari topilgan, lekin 724 nafari haligacha bedarak yo‘qolgan hisoblanadi.
Germaniya Jinoyatchilik politsiyasi federal boshqarmasining aniqlik kiritishicha, statistika tizimidagi bo‘shliqlar sababli bu faqat taxminiy ma’lumotlardir.
Mutaxassislarning ta’kidlashicha, statistikadagi bunday kamchiliklar voyaga yetmaganlarning ekspluatatsiya qilinish xavfini keltirib chiqaradi.
Avvalroq Qo‘shma Shtatlarga Markaziy Amerikadan so‘nggi 20 yil ichida rekord darajada ko‘p noqonuniy muhojirlarning kelishi kutilayotgani ma’lum qilindi. 15-mart kuni chegaradan o‘tuvchilar tarkibida 4,8 ming nafar voyaga yetmagan noqonuniy muhojir bo‘lgan, bu undan oldingi haftaning o‘rtalaridagi ko‘rsatkichdan 25 foiz ko‘proq.
Rossiya Ichki ishlar vazirligi esa chet el fuqarolarini ro‘yxatdan o‘tkazish uchun muhojirlarga davlat xizmatlarini elektron shaklda olish imkonini beradigan yagona axborot platformasi yaratilishini ma’lum qildi.
Izoh (0)