Chilonzorda noqonuniy ravishda kuchli ta’sir qiluvchi dori vositalarini sotgan dorixona faoliyati fosh etildi

Toshkent shahri Chilonzor tumanidagi dorixonalardan birida kuchli ta’sir qiluvchi dori vositalari sotilayotgani aniqlandi, deya xabar bermoqda Bosh prokuratura huzuridagi Departament matbuot xizmati.

Ma’lum qilinishicha, Departament hamda DXXning Chilonzor tumani bo‘limlari tomonidan o‘tkazilgan tezkor tadbirda “S.L.” MChJga qarashli dorixona rahbari va sotuvchisi kuchli ta’sir qiluvchi 30 dona “Zardeks” dori vositasini 600 ming so‘mga sotgan vaqtida ushlanib, tadbirda dorixonada muomalaga kiritish uchun saqlab kelinayotgan yana 870 dona “Zardeks”, 120 dona “Gabagamma” hamda 111 dona “Tebantin” nomli dori vositasi ashyoviy dalil sifatida olingan.

Mazkur holat yuzasidan Jinoyat kodeksining 186-3-moddasi (tarkibida kuchli ta’sir qiluvchi moddalar mavjud bo‘lgan dori vositalarini retsept bo‘yicha chakana realizatsiya qilish tartibini buzish) bilan jinoyat ishi qo‘zg‘atilib, tergov harakatlari o‘tkazilmoqda.

Bundan avval Toshkent va Bo‘stonliq tumanlarida dori vositalarini noqonuniy ravishda qariyb 470 million so‘mga sotganlar ushlangani, Toshkent viloyatida dori vositalarini jami 34 ming dollarga noqonuniy ravishda sotayotgan shaxslar aniqlangani hamda Jizzaxda magistral yo‘l bo‘yida COVID-19 virusini aniqlovchi test va boshqa tibbiy buyumlarni noqonuniy sotayotgan shaxs ushlangani haqida xabar berilgandi.