Ispaniya La Ligasi nufuzi bo‘yicha dunyoda yetakchi o‘rinlarda turishi hech kimga sir emas. Shunga yarasha u yerda barcha davrlarda eng yuqori darajali futbolchilar to‘p surib kelgan. Football Whispers nashri La Liga tarixidagi eng kuchli futbolchilar haqida material tayyorladi. Quyida ushbu maqola o‘zbek tilida taqdim etiladi.
Ladislav Kubala
Ro‘yxat o‘tgan asrning 50-yillarida porlagan vengriyalik futbolchi Ladislav Kubaladan boshlanadi. U 1951-yilda “Barselona”ga o‘tadi. Dastlab ko‘pchilik u haqida hech narsa bilmas edi, boisi u gollarni asosan vatanida urgandi. Ammo u tezda barcha tanqidchilarning ovozini o‘chirishga muvaffaq bo‘ladi.
Ispaniyadagi ilk mavsumida u 26 ta gol uradi va hatto bir o‘yinda raqib darvozasini yettita marta ishg‘ol qilgan hola ham kuzatilgan. Dastlabki uch mavsumda Kubala ikki marta Ispaniya chempionligini va 3 marta mamlakat Kubogini qo‘lga kiritadi. U “Barsa”dagi faoliyati davomida 280 ta gol uradi va 11 ta sovringa ega chiqadi.
Iker Kasilyas
Kasilyas ushbu ro‘yxatdagi yagona darvozabon hisoblanadi. Jahon chempioni va ikki karra Yevropa chempionati g‘olibi “Real” safida 18 yoshida debyut qilgan. Shuningdek, u Chempionlar Ligasida maydonga tushgan eng yosh darvozabonga aylanish bilan birga musobaqada ham g‘alaba qozonadi.
Umumiy hisobda Kasilyas “qirollik klubi” safida 725 ta o‘yin o‘tkazgan. U shulardan 177 tasida o‘z darvozasi daxlsizligini saqlab qola olgan. Iker qo‘lga kiritgan sovrinlari qatoriga esa uchta Chempionlar Ligasi, beshta Ispaniya chempionati bosh sovrini va ikkita Ispaniya Kubogini kiritish mumkin.
Raul
“Real” tarixidagi ikkinchi eng yaxshi to‘purarning bu ro‘yxatdan tushib qolishi shunchaki mantiqsizlik bo‘lardi. U “Real”dagi faoliyatini 15 yoshida boshlagan. U “qaymoqranglilar” safiga azaliy raqib “Atletiko” safidan ko‘chib o‘tadi. Shu tariqa u jamoa tarixidagi eng yosh o‘yinchiga aylanadi, o‘zining dastlabki golini esa aynan sobiq jamoasiga qarshi o‘yinda uradi.
Raulning “Real”dagi debyut mavsumi chempionlik va shaxsiy mukofot bilan yakunlanadi. U Ispaniyadagi faoliyati davomida olti marta Ispaniya chempioni bo‘lishdan tashqari uch marta Chempionlar Ligasida ham g‘alabani tantana qilgan.
Dani Alves
Dani Alvesnning La Liga tarixidagi eng yaxshi o‘ng qanot himoyachisi ekanligi haqida hech kim bahslashmasa kerak. U “Barselona”ga ko‘chib o‘tgach, darhol jamoaning almashtirib bo‘lmas futbolchilardan biriga aylandi. 2008-yildan 2016-yilgacha bo‘lgan davrda u “Barselona”ga uchta Chempionlar Ligasi bosh sovrini, beshta Ispaniya Kubogi va olti marta mamlakat chempionati g‘olibligini qo‘lga kiritishda yordam beradi.
Umuman olganda, braziliyalik futbolchi La Ligada 400 dan ortiq o‘yin o‘tkazgan. Alohida qayd etish joiz bo‘lgan bir jihat shuki, u nafaqat himoyada, balki hujumda ham manaman degan oldingi chiziq vakillari bilan raqobatlasha olardi.
Fransisko Xento
Xentoning sovrinlariga nazar tashlagan inson uning La Liga tarixidagi eng yaxshi o‘yinchilarda biri ekaniga shubha qilmaydi. U umumiy hisobda 12 marta Ispaniya chempionligini qo‘lga kiritgan. Bundan tashqari Xento xalqaro maydonda ham havas qilarli yutuqlarga erishgan. U olti karra Yevropa Chempionlar Kubogi sohibi hisoblanadi.
Xento tezkorligi bilan mashhur bo‘lib, u mazkur xususiyati orqali raqib himoyachilarini dog‘da qoldirib kelgan. U La Ligada 438 marta o‘yin o‘tkazgan, barcha musobaqalarda esa bu ko‘rsatkich 650 taga teng.
Serxio Ramos
Serxio Ramos Ispaniya futboli tarixidagi eng buyuk himoyachilardan biri hisoblanadi. Uni “Sevilya” tarbiyalagan bo‘lsa-da, ammo “Real” tezda yosh iste’dodni o‘z tarkibiga qo‘shib oladi. Ramos yangi klubi safida sadoqatli o‘yinchiga aylanadi.
Xarizmatik va o‘ziga xos futbolchi bo‘lgan Ramos maydonda istalgan ishni amalga oshirishi mumkin. U himoyada o‘tib bo‘lmaydigan qoya bo‘lib, markazda ham, qanotda ham bir xil darajada o‘ynay oladi. Ramos “Real” safida 100 ta gol urib, chempionat tarixida eng ko‘p gol urgan himoyachiga aylangan. Shuningdek, u Madrid klubi libosi ostida 500 dan ortiq uchrashuvda maydonga tushgan.
Xavi va Andres Inyesta
Gap bu ikki futbolchi haqida ketganida barcha qoidalar chetga chiqadi. Ha, bu biroz bo‘rttirib ko‘rsatishdek tuyulishi mumkin, ammo bu ikkalasini bir-biridan ajratib bo‘lmasligi bor gap. Agar futbolchilar birgalikda o‘ynamagan bo‘lganida, ularning yutuqlari u qadar ta’sirli chiqmagan bo‘lardi. Xavi 1998-yilda, “Barselona” La Ligada g‘alaba qozongan mahal jamoadagi debyutini o‘tkazgan. 2002-yilda, Andres Inyesta yarim himoyada paydo bo‘lgunga qadar bu uning yagona sovrini edi. Ushbu duet shu qadar kuchli ediki, o‘n yildan oshiq vaqt davomida “Barselona”ni ularsiz tasavvur qilish shunchaki imkonsiz edi.
Birinchi medaldan tashqari Xavi Inyesta bilan yana yettita sovringa ega chiqqan. Ularning eng yaxshi mavsumi 2012/13-yil bo‘lib qoldi. O‘shanda “Barsa” La Ligada 100 ochko jamg‘argandi. Xavi ketganidan keyin ham Inyesta o‘ynashda va g‘alaba qozonishda davom etdi. Ammo baribir uning yonida Xavining yo‘qligi sezilib turardi. Ular birgalikda to‘rt marta Chempionlar Ligasi bosh sovriniga ega chiqqan. Xavi jamoadan ketgach (2015-yilda), kataloniyaliklar Chempionlar Ligasida biror marta ham chorak finaldan nariga o‘ta olmagan.
Krishtianu Ronaldu
2009—2018-yillarda “Real” tarkibida o‘ynagan Ronaldu bu davr ichida nafaqat o‘zi yangi bosqichga chiqdi, balki klubni ham yangi g‘alabalar sari yetaklab, uning yanada ommalashishiga beqiyos hissasini qo‘shdi. Ispaniyalik muxlislar uni va uning yorqin o‘yinlarini hech qachon unutmasligi aniq.
Ronaldu “Real”da o‘ynagan kezlari 438 o‘yinda 451 ta gol urgan, bu bir o‘yinda bitta goldan ko‘proq deganidir. Faqat La Liganing o‘zida futbolchi 292 o‘yinda 311 gol va 96 golli uzatmani amalga oshirgan.
Portugaliyalikning yordami bilan “qirollik klubi” o‘zining kuboklar to‘plamini ham kengaytirib olganini alohida ta’kidlash joiz, Chempionlar Ligasida to‘rtta, La Liga va Ispaniyada Kubogida ikki martadan g‘alabani tantana qilgan. Ronalduning o‘zi esa “Real” tarixidagi eng yaxshi to‘purarga aylangan va “Oltin to‘p”larining asosiy qismini shu klub safida qo‘lga kiritishga muvaffaq bo‘lgan.
Alfredo di Stefano
La Liga ixlosmandlari Alfredo di Stefanoning ajoyib o‘yinchiligini inkor etmasligi aniq. Qizig‘i, argentinalik futbolchi faoliyatining boshida “Real”da ham, “Barsa”da ham o‘ynash imkoniyatiga ega edi. Ammo kataloniyaliklar di Stefanoning kelajagiga ishonmagan holda uni “qaymoqranglilar”ga berib yuboradi.
Alfredo di Stefano o‘n yildan ortiq vaqt davomida Madridda o‘ynadi va u yerda o‘z ishining eng yaxshilardan biri ekanligini isbotladi. U “Real” safida 396 o‘yinda 308 ta gol uradi. Alfredo “Real”ga ketma-ket besh marta Yevropa Kubogini, shuningdek, sakkiz marta La Liga va bir bor Ispaniya Kubogini yutishda yordam bergan. Shu o‘rinda di Stefanoning ikki karra “Oltin to‘p” sohibi bo‘lganini ham alohida ta’kidlab o‘tish lozim.
Lionel Messi
Va nihoyat navbat argentinalik sehrgar — Lionel Messiga keldi. 13 yoshida “Barselona”ga kelgan bolakay yillar o‘tib, nafaqat klubning, balki butun bir futbol tarixidagi eng yaxshi ikki o‘yinchining biriga aylandi. Shunchaki aqlbovar qilmas hikoya, shunday emasmi?
10 ta chempionlik unvoni va Ronaldudan 150 taga ko‘proq gol. Bu Messining La Ligadagi natijasidir. U Ispaniya chempionatining 2011/12-yilgi mavsumida 37 o‘yinda 50 ta gol urishga erishgan. Shuningdek, Messi “Barselona” tarkibida to‘rt marta Chempionlar Ligasida va olti bor Ispaniya Kubogida g‘alaba qozongan. Shuningdek, Messi 6 ta “Oltin to‘p”ining barchasini “Barselona” tarkibida qo‘lga kiritgan.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)