Футбол бўйича Испания Кубоги финалида «Барселона» 17 апрель, шанба куни Бильбаонинг «Атлетик»и билан баҳс олиб борди ва 4:0 ҳисобида ғалаба қозонди.
Каталонияликларнинг голларидан иккитасига Лионель Месси муаллифлик қилди. Натижада Месси Испания Кубогининг 119 йиллик тарихида 7 та финал учрашувида гол урган илк футболчига айланди.
Қайд этиш жоиз, Месси Испания Кубоги финалларида 10 марта иштирок этиб, 9 та гол урди. Аргентиналик ҳужумчи мазкур мусобақа финалларида энг кўп гол урган «Атлетик» вакили Телмо Сарранинг рекордини ҳам янгилади. Сарра вақтида Испания Кубогининг ҳал қилувчи баҳсларида 8 та гол урганди.
Шунингдек, Месси, Серхио Бускетс ва Херард Пике «Барселона» сафида Испания Кубогини 7 мартадан қўлга киритиб, «Атлетик» собиқ ҳужумчиси Агустин Гаинсанинг рекордини такрорлади.
Маълумот учун, «Барселона» Испания Кубогини умумий ҳисобда 31 марта қўлга киритган.
Месси учун бу «Барселона»да фаолиятидаги 35-соврин сифатида тарихга кирди. Кетма-кет 13 мавсумдан бери 30 тадан кам бўлмаган гол ураётган Месси каталонияликлар сафида қуйидаги совринларни қўлга киритган:
- Ла Лига — 10 марта
- Испания Кубоги — 7 марта
- Испания Суперкубоги — 8 марта
- Чемпионлар Лигаси — 4 марта
- Европа Суперкубоги — 3 марта
- Клублар ўртасидаги ЖЧ — 3 марта
Изоҳ (0)