Qashqadaryo viloyati Qamashi tumanida 18 yoshli yigit aldov yo‘li bilan 14 yoshli qizdan uning otasiga tegishli pullarni olgani aniqlandi.

Foto: IIV Tergov departamenti

IIV Tergov departamentining ma’lum qilishicha, 3-aprel kuni 39 yoshli erkak Q.O. Qamashi tuman IIB boshlig‘i nomiga ariza bilan murojaat qilib, unda 1-aprel kuni soat 09:30 larda 18 yoshli yigit B.M. uning uyida hech kim yo‘qligidan foydalanib, voyaga yetmagan qizi 14 yoshli M.M.ga uyidan pullarini olib chiqib berishini aytib, jami 7300 dollar pullarni aldov yo‘li bilan qo‘lga kiritganligini ma’lum qilgan.

Olib borilgan tergovga qadar tekshiruv harakatlari davomida yigit 39 yoshli erkak Q.O. daromadli joyda ishlashidan xabar topib, uning voyaga yetmagan qizi, 8-sinf o‘quvchisi M.M.ni aldab, u bilan gaplashib yurib, uyidagi pullarini olib chiqib bersa, yana o‘rniga qo‘yishga va’da bergani aniqlangan.

Foto: IIV Tergov departamenti

Holat yuzasidan Qamashi tuman IIB huzuridagi tergov bo‘limi tomonidan B.M.ga nisbatan Jinoyat kodeksining 168-moddasi 3-qismi “a” bandi (ko‘p miqdorda firibgarlik sodir etish) bilan jinoyat ishi qo‘zg‘atilib, undan 6 ming dollar pul ashyoviy dalil tariqasida rasmiylashtirib olingan.

Hozirda tergov harakatlari olib borilmoqda.

Avvalroq Buxoroda uy-joy kommunal xizmat ko‘rsatish boshqarmasi bo‘lim boshlig‘i 2,3 million so‘m pora bilan qo‘lga tushgani, Surxondaryoda 10 million so‘m evaziga er-xotin ajrimini tezlashtirishni va’da qilgan soxta advokat qo‘lga olingani, Toshkentda ikkita Captiva-4 olib berishni va’da qilib, fuqaroni 63 ming dollarga chuv tushirgan shaxsga jinoyat ishi qo‘zg‘atilgani haqida xabar berilgan edi.