Ташқи меҳнат миграцияси агентлиги Россиядаги Ўзбекистон фуқароларини 15 июлга қадар ўз мақомларини қонунийлаштиришга чақирди

Россия Ички ишлар вазирлиги мамлакатдаги Ўзбекистон ҳамда бошқа МДҲ давлатларидан келган ноқонуний мигрантлардан 15 июнга қадар мамлакатни тарк этишни талаб қилгани ҳақида хабар берилганди. Ташқи меҳнат миграцияси агентлиги Россия ҳудудида ноқонуний равишда ишлаб келаётган Ўзбекистон фуқароларини мақомларини қонунийлаштиришга чақирди.

Қайд этилишича, 2020 йил 18 апрелда Россия президентининг «Янги коронавирус (COVID-19) инфекциясининг тарқалиши хавфи туфайли чет эл фуқаролари ва фуқаролиги бўлмаган шахсларнинг Россия Федерациясида ҳуқуқий мақомини белгилаш бўйича вақтинчалик чора-тадбирлар тўғрисида»ги фармони қабул қилинган.

Ушбу фармон доирасида Россия Ички ишлар вазирлиги ҳамда Ўзбекистоннинг Россиядаги дипломатик ваколатхоналари ҳамкорлигида 2020 йилда Россия ҳудудида вақтинча меҳнат фаолиятини амалга ошираётган 50 минг 700 нафар фуқароларнинг мақоми қонунийлаштирилди.

Ҳозирги кунда ушбу фармонга киритилган ўзгартиришлар асосида Россия ҳудудида ноқонуний бўлиб турган хорижий давлат фуқароларига 2021 йил 15 июнга қадар ўз мақомларини қонунийлаштиришга рухсат берилди. Бу ҳақда Ташқи меҳнат миграцияси агентлиги хабар бермоқда.

Шунга кўра, Россия Ички ишлар вазирлиги билан ўрнатилган ҳамкорлик асосида Россия ҳудудида ҳуқуқий мақоми қонунийлаштирилиши керак бўлган 300 минг нафардан ортиқ Ўзбекистон фуқароларининг рўйхати шакллантирилди.

Ушбу рўйхатдаги фуқароларнинг Ўзбекистондаги манзиллари бўйича маҳаллабай ўрганишлар асосида уйма-уй юриб фуқароларнинг оила аъзоларига Россия президентининг юқоридаги фармонининг мазмун-моҳияти тўғрисида тушунтиришлар бериб борилмоқда.

Ҳозирги кунда ушбу тушунтириш ишлари доирасида 200 минг нафардан ортиқ фуқаролар қамраб олинди. Бу тадбирлар давом эттирилмоқда.

Миграция агентлиги Россия ҳудудида ноқонуний равишда бўлиб турган Ўзбекистон фуқаролари 2021 йилнинг 15 июнига қадар яшаш жойидаги тегишли Россиянинг ички ишлар органларига мурожаат қилиш орқали Россия ҳудудида бўлишларини қонунийлаштириш ҳуқуқидан фойдаланишга чақирди.

Бунда Россиянинг ички ишлар органлари томонидан ноқонуний равишда бўлиб турган Ўзбекистон фуқароларига нисбатан мамлакатдан маъмурий чиқариб юбориш, депортация қилиш чорлари қўлланилмайди ҳамда уларга яшаш жойидаги миграция бўлимидан қайта рўйхатдан ўтиш имконияти берилади.

Ушбу масалада ёрдам бериш мақсадида Ўзбекистоннинг Москва шаҳридаги элчихонаси ва Россия минтақаларидаги Бош консулхоналарига ҳамда Ташқи меҳнат миграцияси агентлигининг қуйидаги телефон рақамлари орқали мурожаат қилиш мумкин: