“Urgut” zonasida yangi ishlab chiqilgan 144 million dollarlik 21 ta loyiha uchun zarur miqdorda kredit ajratiladi. Bu haqda ayni paytda Prezident Shavkat Mirziyoyev raisligida Samarqand viloyatida o‘tkazilayotgan viloyat faollari bilan yig‘ilishda so‘z yuritildi, deya xabar bermoqda “Daryo” muxbiri.
“Urgut” erkin iqtisodiy zonasini yanada kengaytirish va rivojlantirish zarur. Bir oy muddatda “Urgut” zonasida yangi ishlab chiqilgan 144 million dollarlik 21 ta loyiha uchun zarur miqdorda kredit ajratiladi. Mas’ul vazirlik rahbariyati bir oy muddatda, Urgutni sanoatni rivojlantirishga ixtisoslashgan innovatsion va investitsion tumanga aylantirish bo‘yicha Vazirlar Mahkamasi qarorini kiritadi. Bunda Urgut tumanini to‘liq erkin iqtisodiy zonaga aylantirish, viloyatning barcha hududlarida “Urgut” erkin iqtisodiy zonasining filiallarini tashkil etish nazarda tutiladi. Ushbu yangi hududlarda infratuzilmalarni qurish uchun Arab muvofiqlashtirish guruhi institutlaridan mablag‘ jalb etish lozim”, — dedi davlat rahbari.
Shavkat Mirziyoyevning qayd etshicha, Samarqand davlat universitetining Urgut filiali tashkil etiladi.
“Urgut” erkin iqtisodiy zonasi negizida “xolding kompaniya” tashkil etiladi va uning rahbari bir vaqtning o‘zida viloyat hokimining sanoatni rivojlantirish bo‘yicha o‘rinbosari bo‘ladi. Viloyat hokimi va bosh vazir o‘rinbosari Umurzoqov “Urgut” erkin iqtisodiy zonasi va uning filiallarida polietilen mahsulotlarini chuqur qayta ishlash loyihalariga 500 million dollar, elektrotexnika sanoati loyihalarini amalga oshirish uchun 250 million dollar jalb etish choralarini ko‘rsin.
“Urgut” erkin iqtisodiy zonasiga berilgan imtiyozlarni barcha tuman va shaharlarga qo‘llash hamda har biriga kamida 50—100 million dollar investitsiyalarni jalb qilish hisobiga, 200 gektar maydonda umumiy qiymati 1 milliard dollarlik qo‘shimcha sanoat loyihalarini amalga oshirish lozim. Ushbu loyihalarni sifatli ishlab chiqish va ijrosini tizimli ta’minlash uchun Loyihalar fabrikasining “Urgut ofisi” tashkil qilinadi. Shuningdek, Samarqand davlat universitetining Urgut filiali ham ochiladi”, — dedi Prezident.
Avvalroq Shavkat Mirziyoyev O‘zbekistonda Mahallabay ishlash markazi tashkil etilishi, shuningdek, Samarqand viloyatiga oilaviy tadbirkorlik uchun 900 mlrd so‘m kredit ajratilishini ma’lum qilgandi.
Izoh (0)