«Ургут» ЭИЗнинг янада ривожланиши ҳамда СамДУнинг Ургут филиали очилиши маълум қилинди

«Ургут» зонасида янги ишлаб чиқилган 144 миллион долларлик 21 та лойиҳа учун зарур миқдорда кредит ажратилади. Бу ҳақда айни пайтда Президент Шавкат Мирзиёев раислигида Самарқанд вилоятида ўтказилаётган вилоят фаоллари билан йиғилишда сўз юритилди, дея хабар бермоқда «Дарё» мухбири.

«Ургут» эркин иқтисодий зонасини янада кенгайтириш ва ривожлантириш зарур. Бир ой муддатда «Ургут» зонасида янги ишлаб чиқилган 144 миллион долларлик 21 та лойиҳа учун зарур миқдорда кредит ажратилади. Масъул вазирлик раҳбарияти бир ой муддатда, Ургутни саноатни ривожлантиришга ихтисослашган инновацион ва инвестицион туманга айлантириш бўйича Вазирлар Маҳкамаси қарорини киритади. Бунда Ургут туманини тўлиқ эркин иқтисодий зонага айлантириш, вилоятнинг барча ҳудудларида «Ургут» эркин иқтисодий зонасининг филиалларини ташкил этиш назарда тутилади. Ушбу янги ҳудудларда инфратузилмаларни қуриш учун Араб мувофиқлаштириш гуруҳи институтларидан маблағ жалб этиш лозим», — деди давлат раҳбари.

Шавкат Мирзиёевнинг қайд эцҳича, Самарқанд давлат университетининг Ургут филиали ташкил этилади.

«Ургут» эркин иқтисодий зонаси негизида «холдинг компания» ташкил этилади ва унинг раҳбари бир вақтнинг ўзида вилоят ҳокимининг саноатни ривожлантириш бўйича ўринбосари бўлади. Вилоят ҳокими ва бош вазир ўринбосари Умурзоқов «Ургут» эркин иқтисодий зонаси ва унинг филиалларида полиэтилен маҳсулотларини чуқур қайта ишлаш лойиҳаларига 500 миллион доллар, электротехника саноати лойиҳаларини амалга ошириш учун 250 миллион доллар жалб этиш чораларини кўрсин.

«Ургут» эркин иқтисодий зонасига берилган имтиёзларни барча туман ва шаҳарларга қўллаш ҳамда ҳар бирига камида 50—100 миллион доллар инвестицияларни жалб қилиш ҳисобига, 200 гектар майдонда умумий қиймати 1 миллиард долларлик қўшимча саноат лойиҳаларини амалга ошириш лозим. Ушбу лойиҳаларни сифатли ишлаб чиқиш ва ижросини тизимли таъминлаш учун Лойиҳалар фабрикасининг «Ургут офиси» ташкил қилинади. Шунингдек, Самарқанд давлат университетининг Ургут филиали ҳам очилади», — деди Президент.

Аввалроқ Шавкат Мирзиёев Ўзбекистонда Маҳаллабай ишлаш маркази ташкил этилиши, шунингдек, Самарқанд вилоятига оилавий тадбиркорлик учун 900 млрд сўм кредит ажратилишини маълум қилганди.