Тошкент вилояти Қуйи Чирчиқ туманида 21 ёшли қизни олиб қочиб кетиб, уни никоҳдан ўтишга мажбурлаган қозоқ миллатига мансуб шахсга нисбатан жиноий иш очилди, дея хабар қилмоқда Тергов департаменти.
Маълум қилинишича, 2021 йилнинг 12 март куни соат 07:55 ларда қозоқ миллатига мансуб бўлган фуқаро 27 ёшли М.Қ. Қуйи Чирчиқ тумани Дўстлик-1 маҳалласи ҳудудида бўла туриб, аввалдан телефон орқали гаплашиб юрган таниши 21 ёшли У.М.ни эркига хилоф равишда никоҳдан ўтиш учун ўғирлаб, ўзининг яшаш хонадонига олиб бориб, у билан никоҳдан ўтишга мажбурлаган.
Лекин У.М. қаршилик кўрсатиб қочиб кетиб, унга нисбатан қонуний чора кўришларини сўраб ИИБга ариза билан мурожаат қилган.
Мазкур ҳолат юзасидан Қуйи Чирчиқ туман ИИБ ҳузуридаги Тергов бўлими томонидан М.Қ.га нисбатан Жиноят кодексининг 136-моддаси 1-қисми (аёлни эрга тегишга мажбур қилиш ёки унинг эрга тегишига тўсқинлик қилиш) билан жиноят иши қўзғатилган.
Ҳозирда тергов ҳаракатлари олиб борилмоқда.
Таъкидланишича, бу турдаги жиноятлар учун Жиноят кодексининг нормаларига кўра базавий ҳисоблаш миқдорининг 25 бараваригача миқдорда жарима ёки 360 соатгача мажбурий жамоат ишлари ёки 3 йилгача ахлоқ тузатиш ишлари ёхуд 1 йилдан 3 йилгача озодликни чеклаш ёки 3 йилгача озодликдан маҳрум қилиш жазоси тайинланади.
Бундан аввал Жиззахда мактаб ўқувчисини зўрлаган шахс жинояти 20 йил ўтиб фош бўлгани, Тошкент вилоятида 14 ёшли қизнинг номусига тегганликда гумонланаётган шахс қамоққа олингани маълум қилингани ҳамда Наманганда икки йигит томонидан олиб қочилган 16 ёшли қиз ўзини машинадан ташлаб ҳалок бўлгани ҳақида хабар берилганди.
Изоҳ (0)