Turmada jazo o‘tagan shaxs terroristik tashkilot tarafdori ekanligi aniqlandi. Bu haqda Navoiy viloyat hokimligi axborot xizmati xabar berdi.
Qayd etilishicha, farg‘onalik fuqaro U.A. (ismi-sharifi o‘zgartirilgan) muqaddam sodir etgan o‘g‘rilik jinoyatlari uchun besh marotaba sudlangan, oxirgi marta 2015-yilda sodir etgan o‘g‘rilik jinoyati uchun sudlanib, jazoni ijro etish koloniyasida ozodlikdan mahrum qilish jazosini o‘tab kelayotgan bo‘lgan.
Jinoyat ishi hujjatlari hamda sudda aniqlangan holatlarga ko‘ra, mahkum U.A Navoiy shahridagi 11-sonli jazoni ijro etish koloniyasida jazo muddatini o‘tash davomida, ya’ni 2018-yilning noyabr oyidan 2019-yil yanvar oyiga qadar “Islom xalifaligi davlati” qurishni o‘z oldiga maqsad qilib, butun dunyoda, jumladan, O‘zbekiston hududida faoliyat olib borishi taqiqlangan “Hizb ut-Tahrir al-Islomiy” xalqaro terroristik tashkilotning g‘oyalarini qo‘llab, terroristik tashkilot g‘oyalari bilan yo‘g‘rilgan varaqalarni qo‘lyozma shaklida, matndagi ayrim so‘zlarni qisqartirgan holda tayyorlab, turma uchastkasidagi mahkumlarga tarqatgan.
Jinoyat ishlari bo‘yicha Navbahor tuman sudi tomonidan 2021-yil 12-mart kuni U.A.ga nisbatan bo‘lgan jinoyat ishi sud muhokamasida ko‘rib chiqilgan va uning aybi sudda to‘liq o‘z tasdig‘ini topgan.
Sud tomonidan U.A.ga nisbatan Jinoyat kodeksi 159-moddasining 1-qismi (O‘zbekiston Respublikasining konstitutsiyaviy tuzumiga tajovuz qilish) va 244-1-moddasi (jamoat xavfsizligi va jamoat tartibiga tahdid soladigan materiallarni tayyorlash, saqlash, tarqatish yoki namoyish etish) 2-qismi bilan Jinoyat kodeksining 59, 60-moddalari tartibida ozodlikdan mahrum qilish jazosi tayinlanib, jazoni qattiq tartibli koloniyada o‘tash belgilandi.
Eslatib o‘tamiz, O‘zbekistonda 2021—2023-yillar davomida qamoqxona xodimlari bodikamera bilan ta’minlanadi. Mahkumlarning jazoni o‘tash tartibini buzish holatlarini aniqlash maqsadida kuzatish va mustaqil nazorat qilish imkoniyatiga ega intellektual kameralar (Smart) tizimi muassasalarga o‘rnatiladi.
Izoh (0)