Shavkat Mirziyoyev mutasaddi rahbarlarga yil yakunigacha 2 million nafar yoshlarni to‘garak va musobaqalarga jalb qilish bo‘yicha topshiriq berdi

O‘zbekistondagi mavjud 215 ta “Barkamol avlod” bolalar markazlari bor-yo‘g‘i 175 ming nafar, ya’ni 3 foiz yoshlarni qamrab olgan, xolos. Bu haqda Prezident Shavkat Mirziyoyev raisligida yoshlar masalalariga bag‘ishlab o‘tkazilgan yig‘ilishda so‘z yuritildi, deya xabar bermoqda “Daryo” muxbiri.

“Yoshlarning bo‘sh vaqtini mazmunli o‘tkazishga e’tiborni yanada kuchaytirish zarur. Bu borada respublika bo‘yicha mavjud 215 ta ‘Barkamol avlod’ bolalar markazlari imkoniyatlaridan to‘liq va samarali foydalanish kerak. Bugungi kunda ‘Barkamol avlod’ bolalar markazlari bor-yo‘g‘i 175 ming nafar (3 foiz) yoshlarni qamrab olgan, xolos.

Shu bois viloyat, tuman va shahar hokimlari o‘n kun muddatda ‘Barkamol avlod’ markazlarida zamonaviy to‘garaklar ochish va ularning har bir maktabda tarmoq filiallarini tashkil etish orqali qamrovni kamida 3-5 baravarga oshirish bo‘yicha rejasini ishlab chiqadi va amalga oshiradi. Respublika bo‘yicha kamida 500 ming yoshlarni qamrab olish kerak.

Shu bilan birga mas’ul tashkilot rahbarlari joriy yilda 2 million nafar yoshlarni ta’lim muassasalarining sport zallari va maydonlarida to‘garaklar hamda musobaqalarga jalb qilishi kerak. Shuningdek, yozgi ta’til davrida yoshlar o‘rtasida mahallalar, sektorlar va tumanlar miqyosida sport hamda harbiy vatanparvarlik musobaqalarini tashkil etishlari zarur. Shu maqsadda, yoshlarni sport, madaniyat va san’atga qiziqtirish uchun tanlov va musobaqalar ko‘paytiriladi”, – dedi davlat rahbari.

Prezident mutasaddi tashkilot rahbarlariga viloyat hokimlari bilan birga, bir oy muddatda mahalla, tuman, viloyat, respublika darajasida tanlov va musobaqalar o‘tkazish grafigini tasdiqlash hamda kundalik ijrosini tashkil qilish zarurligini qayd etdi.