Бухоро шаҳридаги Алпомиш кўчасининг номи 2016—2020 йилларда Бухоро вилояти ҳокими бўлиб ишлаган Ўктам Барноев номига ўзгартирилди. Халқ депутатлари Бухоро шаҳар Кенгашининг ўттиз саккизинчи сессиясида бу таклиф депутатлар томонидан бир овоздан маъқулланди, дея хабар қилмоқда «Халқ сўзи online».
«Ўктам Исаевич юртпарвар, элпарвар, фидойи раҳбар сифатида халқимиз ёдида қолди. У Бухорода жуда кўплаб хайрли ишлар ташаббускори бўлди. Мен бу ўринда биргина мисол билан кифояланмоқчиман. Биласиз, Маҳмуд Торобий —юрт озодлиги йўлида жонини фидо этган буюк аждодимиздир. Ўктам Исаевич унинг хотирасини абадийлаштириш мақсадида Жондор туман марказида Маҳмуд Торобий номидаги ҳарбий-ватанпарварлик боғини барпо этиш ташаббускори бўлди. Ҳозир бу гўша ёшларни эл-юртга муҳаббат руҳида тарбиялашдек улуғ ишга камарбаста масканга айланган», — дейди меҳнат фахрийси Сафар Аҳмедов.
Эслатиб ўтамиз, бош вазир ўринбосари Ўктам Барноев 2020 йил 20 сентябрь куни вафот этганди. Маълумотларга кўра, Барноев Германияда вафот этган — у хорижий мамлакатга даволаниш учун олиб кетилган. Бош вазир ўринбосарининг коронавирусга чалингани июль ойи охирида маълум бўлган эди. Президент Барноевнинг оила аъзоларига таъзия билдириш пайтида бу ҳақда гапириб, «Гапирмасам ҳам, мени тушунарди», дея таърифлаган эди. Самарқанд шаҳридаги кўчаларнинг бирига Ўктам Барноев номи берилган.
Шунингдек, Халқ депутатлари шаҳар Кенгашининг сессиясида Ғиждувон кўчасини Карим Камолов номи билан аташ тўғрисидаги таклиф қўллаб-қувватланди.
Бухоро вилояти ҳокими вазифасини бажарувчи Карим Камолов 2020 йил 22 август куни 65 ёшида вафот этганди. Карим Камолов коронавирусга чалиниб, Тошкентда касалликдан даволанаётгани ҳақида илк бор 30 июль куни Соғлиқни сақлаш вазирлиги ҳузуридаги Коронавирусга қарши кураш штаби аъзолари маълум қилган эди.
Маълумот учун, 2020 йилнинг февралида Бухоро вилояти ҳокими Ўктам Барноев бош вазир ўринбосари этиб тайинлангани муносабати билан Карим Камолов вилоят ҳокими вазифасини бажарувчи этиб тайинланган эди. Унгача Камолов Бухоро шаҳари ҳокими вазифасида ишлаган.
Изоҳ (0)