«Ўзбекистонда шакар муаммоси бўлмайди» — «Ангрен шакар» бош директори

«Шакар муаммоси ривожланган давлатларни ҳам забт этмоқда. Ўзбекистонда-чи?» номли мақола ЎзАда эълон қилинган эди. Унда глобал муаммога айланаётган шакар муаммоси таҳлил қилинган. Бундай муаммо Ўзбекистонда ҳам юзага келиши мумкинми? «Rost24.uz» «Ангрен шакар» МЧЖ маъмуриятидан бунга жавоб олди.

«Ўзбекистонда шакар муаммоси бўлмайди. Чунки шакар ишлаб чиқариш ҳукумат сиёсати даражасида қаралгани боис шакар ишлаб чиқариш ва етказиб бериш тизимли йўлга қўйилган. 2014 йилда биз тўлиқ шакар мустақиллигига эришиб бўлганмиз», — дейди «Ангрен шакар» МЧЖ бош директори Рустам Акбархўжаев.

Унинг сўзларига кўра, узлуксиз ишлаб чиқариш тизимига ўтган «Ангрен шакар» ва «Хоразм шакар» заводлари Ўзбекистон аҳолисининг эҳтиёжи учун зарур бўлган 700 минг тоннани етказиб бермоқда. Иккита шакар ишлаб чиқарувчи корхонамиз нафақат аҳолини таъминлаш ҳаттоки, экспорт қилиш имкониятига ҳам эга.

«Муқобили йўқ озиқ-овқатлар рўйхатининг бошида турадиган шакар ҳар доим ҳам сиёсат даражасида жиддий назоратни талаб қилиб келган. Унга бироз эътиборсизлик эса қандай оқибатларга олиб келишини ҳар бир давлатнинг ҳукуматдагилари яхши билади. Ўзбекистонда коронавирус пандемияси даврида шакар муаммоси бироз сезилган эди. Халқимизнинг шакарга бўлган эҳтиёжини қондиришни Президентимизнинг шахсан ўзлари назоратга олганлиги боис муаммо дарҳол бартараф этилди. Айни дамда эса Ўзбекистонда шакар танқислиги сезилмаяпти. Бу Президентимизнинг узоқни кўзлаб иш олиб боришининг самарасидир», — деб таъкидлаган Рустам Акбархўжаев.

Унинг айтишича, нархда ҳам ўзгариш йўқ. «Ангрен шакар»дан биржага чиқаётган шакар нархи 7 120 сўмни, «Хоразм шакар»ники эса 7 150 сўмни ташкил этмоқда. «Худо хоҳласа, бундан кейин ҳам Ўзбекистондаги шакар нархида ўзгариш (кўтарилиш) бўлмайди, деб айта оламан. Хом ашё захирамиз етарли», — деб таъкидлаган «Ангрен шакар» МЧЖ бош директори.

Эслатиб ўтамиз, «Ички истеъмол бозорини асосий турдаги озиқ-овқат маҳсулотлари билан кафолатли таъминлашга доир қўшимча чора-тадбирлар тўғрисида»ги ҳукумат қарорида 2021 йилда меъёр бўйича икки ойлик эҳтиёж доирасида Ўзбекистонга 64 минг тонна шакар импорт асосида келтирилиши назарда тутилган.