Malta hukumati yoz oylarida mamlakatga kelib, kamida uch kun turgan sayyohlarga 200 yevrogacha to‘lashni rejalashtirmoqda. Bu haqda Reuters xabar berdi.
9-aprel kuni turizm vaziri Kleyton Bartolo mamlakatda koronavirus bilan bog‘liq ko‘plab cheklovlarning 1-iyunga kelib bekor qilinishi va mehmonxonalardan oldindan band qiluvchi sayyohlarga bonuslar berilishini ko‘zda tutuvchi rejani taqdim etdi.
Shunday qilib, oldindan joy band qilgan sayyohlar besh yulduzli mehmonxonada 200 yevro, to‘rt yulduzli mehmonnxonada — 150 yevro, uch yulduzli mexmonxonada — 100 yevro miqdorida bonus oladi. Agar sayyoh Maltadan uch kilometr shimolda joylashgan Gotso orolidan biror obyektni turar joy sifatida tanlasa, bonuslar yana 10 foizga oshiriladi.
“Bu tizim xalqaro sayyohlikning tiklanib borishi bilan Malta mehmonxonalarining raqobatbardoshligini ta’minlashga qaratilgan”, — deb ta’kidladi turizm vaziri.
Ma’lumotlarga ko‘ra, turizm sektori bevosita va bilvosita orol davlati iqtisodiyotining 27 foizini tashkil qiladi, lekin pandemiya sababli soha faoliyati deyarli to‘xtab qoldi. 2019-yilda Maltaga 2,7 million sayyoh tashrif buyurgan bo‘lsa, 2020-yilda bu ko‘rsatkich 80 foizga tushib ketdi.
Avvalroq sayyohlar uchun to‘liq ochiq bo‘lgan mamlakatlar nomi ma’lum qilindi. Unga ko‘ra, hozir dunyoda xorijiy sayyohlar uchun koronavirus bilan bog‘liq cheklovlarsiz faqat beshta mamlakat mavjud. Shuningdek, 69 ta mamlakat avvalgidek kirish uchun yopiq.
Seyshel orollari hukumati ham 25-mart kuni karantin va vaksinatsiya sertifikati talab qilishni bekor qilib, chet ellik sayyohlar uchun chegaralarni ochdi.
Shuningdek, Turkiyada “xavfsiz turizm dasturi” doirasida turizm xodimlarini koronavirusga qarshi rejadan tashqari bepul emlash boshlandi.
“Xavfsiz turizm dasturi” yaqinlashib kelayotgan sayyohlik mavsumida chet ellik sayyohlarni kutib olish hamda soha vakillari va tub aholining salomatligini ta’minlash uchun ishlab chiqilgan.
Izoh (0)