Farg‘ona shahrida tovlamachilik yo‘li bilan fuqarodan 2 ming AQSh dollari talab qilgan ayollar qo‘lga olindi, deya xabar bermoqda Tergov departamenti.
Qayd etilishicha, 2021-yilning 6-aprel kuni 47 yoshli I.A. (ayol) Farg‘ona shahri bo‘yicha IIO FMB boshlig‘i nomiga ariza bilan murojaat qilgan.
Arizada 30 yoshli G.U. (ayol) kelinoyisi 27 yoshli Sh.U. bilan birgalikda I.A.ning jiyani 37 yoshli A.K.ning harakatlari uchun ariza bilan murojaat qilib, ushbu arizani qaytarib olishlari evaziga 2 000 AQSh dollar berishini talab qilib, pullarni bermasa, jinoiy javobgar qildirish bilan qo‘rqitayotganini va ularga nisbatan qonuniy chora ko‘rishni so‘ragan.
Ma’lum qilinishicha, 6-aprel kuni G.U. va Sh.U. I.A.dan tovlamachilik yo‘li bilan 2 000 AQSh dollar pul mablag‘larini olayotganlarida ushlangan.
Mazkur holat yuzasidan Farg‘ona shahri bo‘yicha IIO FMB huzuridagi Tergov bo‘limi tomonidan G.U. va Sh.U.ga nisbatan Jinoyat kodeksining 165-moddasi 2-qismi “v” bandi (tovlamachilik) bilan jinoyat ishi qo‘zg‘atilib, gumon qilinuvchi tariqasida jalb qilingan.
Tergov davomida yuqorida keltirilgan A.K.ning harakatlari (G.U. va Sh.U. keltirilgan vajlar) yuzasidan tergovga qadar tekshiruv harakatlari olib borilmoqda.
Jinoyat ishi doirasida ushbu fuqarolarning xatti-harakatlariga huquqiy baho berilishi ta’minlanishi ta’kidlangan.
Bundan avval Samarqandda 21 yoshli qizning shaxsiy suratlarini tarqatib yubormaslik evaziga 400 dollar so‘ragan institut o‘qituvchisi ushlangani, namanganlik erkak bilan Telegram’da yolg‘ondan ishqiy munosabatga kirishib, so‘ngra ushbu yozishmalarni tarqatmaslik evaziga undan 1000 dollar so‘ragan ayol qo‘lga olingani hamda bekobodlik ayolning eski Telegram akkauntidagi shaxsiy rasmlarini internetda tarqatib yubormaslik uchun undan 5 mln so‘m so‘ragan 15 yoshli qiz ushlangani haqida xabar berilgandi.
Izoh (0)