Ўзбекистон Президентининг «Кино санъати ва кино саноатини сифат жиҳатидан янги босқичга кўтариш ва соҳани давлат томонидан қўллаб-қувватлаш тизимини янада такомиллаштириш чора-тадбирлари тўғрисида»ги фармони билан «Ўзбеккино» миллий агентлиги Ўзбекистон Кинематография агентлиги этиб қайта номланди, деб хабар беради ЎзА.
Фармон билан «Ипак йўли дурдонаси» Тошкент халқаро кинофестивали таъсис этилди ҳамда у 2021 йилдан мунтазам ўтказиб борилади.
Шунингдек, кино санъати ва саноати вакилларининг муаллифлик ҳуқуқларини жамоавий асосда бошқарадиган Ўзбекистон кино саноати вакиллари уюшмаси нодавлат нотижорат ташкилоти ташкил этилади, ОТМларнинг кинематография йўналишида таълим олаётган талабаларини қўллаб-қувватлаш учун Худойберган Девонов номидаги давлат стипендияси таъсис этилади.
Бундан ташқари, «Олтин Ҳумо» миллий кино мукофоти тақдимоти ҳар йили анъанавий равишда ўтказиб борилади.
Фармон билан миллий кинематография соҳасида самарали ишлайдиган ижодий ишчилар ва мутахассисларни рағбатлантириш мақсадида «Кинематография фидокори» кўкрак нишони таъсис этилади. Шунингдек, Миллий кинематографияни ривожлантириш маркази нодавлат нотижорат ташкилоти ташкил этилди.
Миллий сериаллар ишлаб чиқаришни қўллаб-қувватлаш ва ривожлантириш учун республика миқёсида фаолият юритувчи телеканалларга агентлик томонидан ҳар йили 12 миллиард сўмдан кам бўлмаган миқдорда субсидия маблағлари ажратилади.
Бундан ташқари, марказ ҳужжатли ва хроникал фильмлар ишлаб чиқаришни очиқ танлов асосида ташкил этади.
Қуйидагилар марказнинг асосий вазифалари ҳисобланади:
- миллий фильм ва сериаллар ишлаб чиқаришни ҳамда ҳамкорликда киномаҳсулотлар яратишни молиявий қўллаб-қувватлаш;
- давлат буюртмаси асосида ишлаб чиқарилган фильмлар прокатини бозор тамойиллари асосида ташкил этиш;
- маҳаллий ва хорижий инвесторларни миллий фильмларни ишлаб чиқариш, прокатга бериш ва намойиш этишни молиялаштиришга жалб қилиш;
- миллий фильмларни хорижий тилларга ҳамда жаҳоннинг энг сара кино асарларини давлат тилига субтитрлаштириш ва дубляж қилишни молиялаштириш;
- миллий кино санъати асарларининг халқаро кинофестивалларда иштирок этишини таъминлаш ҳамда маҳаллий ва халқаро кинотадбирларни ташкиллаштириш;
- Ўзбекистон киноарбоблари ижодий уюшмаси ҳамда фаолият йўналиши кино санъати ва саноати вакилларининг ҳуқуқларини ҳимоя қилиш бўлган нодавлат нотижорат ташкилотларини грант ва ижтимоий буюртмалар орқали қўллаб-қувватлаш.
Шу билан бирга, «Мультипликацион фильмлар студияси» ДУК, «Республика кинопрокат маркази» ДУК ва унинг ҳудудий филиаллари, «Кинематографчилар уйи» ДУК; ҳамда «Киноиндустрия соҳаси ходимларини қайта тайёрлаш ва уларнинг малакасини ошириш маркази» ДУК фаолияти тугатилади. «Ёшлар ижодий тажриба студияси» ДУК «Ёшлик» киностудияси» ДУК этиб қайта номланди.
Эслатиб ўтамиз, Ўзбекистон Президенти 2020 йил 20 ноябрь куни «Ўзбекфильм» киностудиясининг замонавий қиёфа касб этган янги биноси ва унинг фаолияти билан яқиндан танишган эди. Шунингдек, Шавкат Мирзиёев кинематография вакиллари билан учрашувда ўзбек киносини янада ривожлантиришга тааллуқли ўзининг бир қатор таклиф ва фикрларини ҳам билдирганди.
Изоҳ (0)