O‘zbekistonda qayta tiklanuvchi energiya manbalari va vodorod energetikasini rivojlantirish maqsadida Energetika vazirligi huzurida Qayta tiklanuvchi energiya manbalari milliy ilmiy-tadqiqot instituti tashkil etiladi, deb xabar bermoqda vazirlik matbuot xizmati.
Bu haqda Shavkat Mirziyoyev tomonidan 9-aprel kuni imzolangan “O‘zbekiston Respublikasida qayta tiklanuvchi va vodorod energetikasini rivojlantirish chora-tadbirlari to‘g‘risida”gi qarorda ko‘zda tutilgan.
Institut tarkibida Vodorod energetikasi ilmiy-tadqiqot markazini hamda Qayta tiklanuvchi va vodorod energetikasi texnologiyalarini sinash va sertifikatlash laboratoriyasini tashkil etish rejalashtirilgan. Adliya vazirligi matbuot xizmatining ma’lum qilishicha, 2021-yilda Institut faoliyatini tashkil etish uchun 50 milliard so‘mgacha mablag‘ ajratiladi.
Avvalroq O‘zbekistondagi birinchi shamol elektrostansiyasini qurish boshlangani haqida xabar berilgan edi. Qayta tiklanuvchi energiya manbalarini rivojlantirish bo‘yicha yetakchi xalqaro kompaniyalardan biri bo‘lgan BAAning Masdar kompaniyasi 1-aprel kuni Navoiy viloyatining Zarafshon shahrida shamol elektr stansiyasi qurilishiga tamal toshini qo‘ydi. BAAning Phanes Group kompaniyasi esa Navoiy viloyatida quyosh fotoelektr stansiyasini quradi.
Buxoro viloyatida Saudiya Arabistoni ACWA Power kompaniyasi umumiy quvvati 1 GVt bo‘lgan ikkita shamol elektr stansiyasini quradi.
Izoh (0)