Termizda bir erkak maktab o‘quvchisini ikki marta zo‘rlagan. Huquqni muhofaza qilish idoralari bu ishni “tinchitib yuborgan”, dedi Senatning Mudofaa va xavfsizlik qo‘mitasi a’zosi Farhod Boqiyev. Bu haqda “Podrobno.uz” xabar qilmoqda.
Ma’lum qilinishicha, Termizda yashovchi B.E. 2020-yil yanvarida 16 yoshli maktab o‘quvchisini zo‘rlagan. Keyinchalik u ushbu fakt to‘g‘risida ijtimoiy tarmoqlar orqali xabar berishini aytib, uni qo‘rqitib, kuch ishlatib, uni bir necha bor zo‘rlagan.
“Ushbu jinoyatni sodir etgan shaxsga nisbatan Termiz shahar Ichki ishlar organlari faoliyatini muvofiqlashtirish bo‘limi qariyb 14 oydan buyon qonuniy choralar ko‘rmayapti”, – dedi Boqiyev.
Yil davomida jabrlangan qizning ota-onasi tomonidan Termiz shahar IIB va boshqa ma’muriy organlarga jinoyatni sodir etgan shaxsga nisbatan qonuniy chora ko‘rishni so‘rab qilgan barcha murojaatlar bekor ketgan.
“Termiz shahar IIB FMO sifatsiz tekshiruv o‘tkazdi, jinoyat ishini qo‘zg‘atishdan bosh tortish to‘g‘risida qarorlar qabul qildi. Shuningdek, jinoyatni sodir etgan shaxsning do‘stlari Termiz shahar IIBda ishlaydi. Shu sababli ish “tinchitilgan”. Bu jabrlanuvchi ota-onasining Senatga so‘nggi chora sifatida murojaat qilishiga sabab bo‘lgan”, – dedi senator.
Senatning Mudofaa va xavfsizlik qo‘mitasi ushbu tekshiruvning har tomonlama va obyektiv o‘tkazilishini va uning natijalariga ko‘ra qonuniy qaror qabul qilinishini o‘z nazoratiga oldi. Tergov yakunlari bo‘yicha qo‘shimcha ma’lumotlar beriladi.
Bundan avval Jizzaxda maktab o‘quvchisini zo‘rlagan shaxs jinoyati 20 yil o‘tib fosh bo‘lgani, Qashqadaryoda 8-sinf o‘quvchisini zo‘rlagan va qizning homiladorligini bilgach, unga o‘zini o‘ldirish usullarini o‘rgatgani aytilgan fuqaro javobgarlikka tortilmasligi ma’lum bo‘lgani hamda Quvada 19 yoshli qizni uch kishi zo‘rlab nomusiga teggani haqida xabar berilgandi
Izoh (0)