Ўзбекистонда қайта тикланувчи энергия манбалари ва водород энергетикасини ривожлантириш мақсадида Энергетика вазирлиги ҳузурида Қайта тикланувчи энергия манбалари миллий илмий-тадқиқот институти ташкил этилади, деб хабар бермоқда вазирлик матбуот хизмати.
Бу ҳақда Шавкат Мирзиёев томонидан 9 апрель куни имзоланган «Ўзбекистон Республикасида қайта тикланувчи ва водород энергетикасини ривожлантириш чора-тадбирлари тўғрисида»ги қарорда кўзда тутилган.
Институт таркибида Водород энергетикаси илмий-тадқиқот марказини ҳамда Қайта тикланувчи ва водород энергетикаси технологияларини синаш ва сертификатлаш лабораториясини ташкил этиш режалаштирилган. Адлия вазирлиги матбуот хизматининг маълум қилишича, 2021 йилда Институт фаолиятини ташкил этиш учун 50 миллиард сўмгача маблағ ажратилади.
Аввалроқ Ўзбекистондаги биринчи шамол электростанциясини қуриш бошлангани ҳақида хабар берилган эди. Қайта тикланувчи энергия манбаларини ривожлантириш бўйича етакчи халқаро компаниялардан бири бўлган БААнинг Masdar компанияси 1 апрель куни Навоий вилоятининг Зарафшон шаҳрида шамол электр станцияси қурилишига тамал тошини қўйди. БААнинг Phanes Group компанияси эса Навоий вилоятида қуёш фотоэлектр станциясини қуради.
Бухоро вилоятида Саудия Арабистони ACWA Power компанияси умумий қуввати 1 ГВт бўлган иккита шамол электр станциясини қуради.
Изоҳ (0)