Ўзбекистон Молия вазирлиги, «Ўзтрансгаз», Россия давлат тараққиёт корпорацияси (VEB.RF), Россиянинг экспорт кредитлари ва инвестицияларини суғурталаш агентлиги ва «Газпромбанк» Ўзбекистонда газ транспорт тизимини модернизация қилиш лойиҳаси бўйича ҳамкорлик қилишга келишиб олди, деб хабар беради «Gazeta.uz».
Маълум қилинишича, томонлар 618 миллион долларгача синдикатланган кредит ташкил этиш имкониятини кўриб чиқади.
«VEB.RF Россия нефть маҳсулотларини Ўзбекистоннинг нефть ва газ соҳасида тарғиб қилиш учун шароит яратмоқда. Синдикатланган кредит миқдорининг камида 50 фоизи Россия маҳсулот ва хизматларининг экспорт тўловлари учун сарфланади», — дейди «Россия давлат тараққиёт корпорацияси раиси ўринбосари, бошқарув аъзоси Даниил Алгулян.
Эслатиб ўтамиз, 2020 йил декабрь ойида VEB.RF, «Газпромбанк» ва «Ўзбекнефтгаз» Ўзбекистонда углеводород ишлаб чиқаришни кўпайтириш дастурининг иккинчи босқичини молиялаштириш бўйича ҳамкорлик қилишга келишиб олган эди. Табиий газ ишлаб чиқариш ҳажмини ошириш мақсадида 2020 йил ноябрь ойида компаниянинг ишлаб чиқариш қувватларини қуриш ва модернизация қилиш учун Россия маҳсулотларини етказиб беришни молиялаштиришга 40 миллион еврогача кредит шартномаси имзоланганди.
Аввалроқ Тошкент шаҳрида «Иннопром. Ўзбекистонда катта саноат ҳафталиги» халқаро саноат кўргазмаси бошлангани, бош вазир Абдулла Арипов кўргазмага ташриф буюрган хорижий мамлакатлар делегациялари раҳбарларини қабул қилгани тўғрисида хабар берилганди.
Изоҳ (0)