Samarqand viloyati Nurobod tumaniga ayol kishi prokuror etib tayinlandi, deya xabar bermoqda “Xalq so‘zi online”.
Ma’lum qilinishicha, Samarqand viloyati Nurobod tumani hokimligi majlislar zalida viloyat prokurori R.Masharipov, viloyat davlat soliq boshqarmasi boshlig‘i A.Inagamov, tuman hokimi F.Zairov va tumandagi huquqni muhofaza qilish organlari rahbarlari hamda faollar ishtirokida yig‘ilish bo‘lib o‘tdi.
Yig‘ilishda tashkiliy masala ko‘rilib, O‘zbekiston bosh prokurorining buyrug‘i bilan Soyipova Norsuluv Rahimovna Nurobod tumani prokurori lavozimiga tayinlandi.
Norsuluv Soyipova 1979-yilda Kattaqo‘rg‘on tumanida tug‘ilgan, ma’lumoti oliy — huquqshunos. 2001-yilda Toshkent davlat yuridik institutini tamomlagan.
U prokuratura organlaridagi xizmat faoliyatini Samarqand tumani prokuraturasida boshlab, 2019-yildan buyon Samarqand shahar prokurorining katta yordamchisi lavozimida faoliyat yuritgan.
Ma’lumot uchun, Norsuluv Soyipova ayni vaqtda Samarqand viloyatidagi yagona ayol tuman prokurori hisoblanadi.
Avvalroq Shavkat Mirziyoyev tez orada viloyat hokimlari orasida ham ayollar bo‘lishiga umid bildirgandi.
Izoh (0)