Самарқанд вилояти Нуробод туманига аёл киши прокурор этиб тайинланди, дея хабар бермоқда «Халқ сўзи online».
Маълум қилинишича, Самарқанд вилояти Нуробод тумани ҳокимлиги мажлислар залида вилоят прокурори Р.Машарипов, вилоят давлат солиқ бошқармаси бошлиғи А.Инагамов, туман ҳокими Ф.Заиров ва тумандаги ҳуқуқни муҳофаза қилиш органлари раҳбарлари ҳамда фаоллар иштирокида йиғилиш бўлиб ўтди.
Йиғилишда ташкилий масала кўрилиб, Ўзбекистон бош прокурорининг буйруғи билан Сойипова Норсулув Раҳимовна Нуробод тумани прокурори лавозимига тайинланди.
Норсулув Сойипова 1979 йилда Каттақўрғон туманида туғилган, маълумоти олий — ҳуқуқшунос. 2001 йилда Тошкент давлат юридик институтини тамомлаган.
У прокуратура органларидаги хизмат фаолиятини Самарқанд тумани прокуратурасида бошлаб, 2019 йилдан буён Самарқанд шаҳар прокурорининг катта ёрдамчиси лавозимида фаолият юритган.
Маълумот учун, Норсулув Сойипова айни вақтда Самарқанд вилоятидаги ягона аёл туман прокурори ҳисобланади.
Аввалроқ Шавкат Мирзиёев тез орада вилоят ҳокимлари орасида ҳам аёллар бўлишига умид билдирганди.
Изоҳ (0)