Россия саноат ва савдо вазири Денис Мантуров бошчилигидаги делегацияси бўлган самолёт 4 апрель куни Ислом Каримов номидаги Тошкент халқаро аэропортига келиб қўнди. Бу ҳақда Telegram’даги «Новости Ташкентского неба» канали хабар берди.
Денис Мантуров 5—7 апрель кунлари Тошкентдаги «Ўзэкспомарказ» миллий кўргазмалар марказида бўлиб ўтадиган халқаро саноат кўргазмасида иштирок этиши кутилмоқда. Тадбир Россия Саноат ва савдо вазирлиги ҳамда Ўзбекистон Инвестициялар ва ташқи савдо вазирлиги томонидан ташкил этилмоқда.
Инвестициялар ва ташқи савдо вазирлиги матбуот хизматининг маълум қилишича, ушбу кўргазмада ва бизнес-дастурда Арманистон, Беларусь, Германия, Қозоғистон, Қирғизистон, Россия, Ўзбекистон, Франция, Чехия ва Япониянинг 300 дан ортиқ саноат компаниялари ва ишбилармонлар делегациялари иштирок этади.
Тадбирдан кўзланган асосий мақсад – иштирокчи мамлакатлар ва компаниялар ўртасида саноат кооперациясини кенгайтириш, саноатни ривожлантириш ва қўшма корхоналар ташкил этишнинг янги имкониятларини аниқлашдан иборат. Кўргазманинг асосий бўлимлари: транспорт ва энергетика машинасозлиги, саноат АТ, шаҳарлар учун технологиялар, тиббий асбоб-ускуналар ва фармацевтика, металлургия ва материаллар, пластмасса ва каучуклар.
Бизнес дастурининг биринчи кунида Россия саноат ва савдо вазири Дениш Мантуров ва Ўзбекистон бош вазирининг ўринбосари – инвестициялар ва ташқи савдо вазири Сардор Умрзоқов иштирокида «Жаҳон саноат ишлаб чиқариш соҳаси ўсиш драйверларини аниқламоқда» асосий Стратегик сессияси бўлиб ўтади.
Маълумот учун, Россиянинг «Иннопром» саноат кўргазмаси 2010 йилдан бошлаб Екатеринбургда ҳар йили ўтказиб келинмоқда. Кўргазма майдони 50 минг квадрат метр бўлиб, у «Екатеринбург ЭКСПО» халқаро кўргазмалар мажмуасининг 4 павильонини эгаллайди. Ҳар йили кўргазмада 600 тадан ортиқ экспонентлар намойиш этилади ҳамда дунёнинг энг йирик компаниялар: Siemens, FANUC, Mazak, Rittal, KUKA, Yaskawa, Volvo, SAP, Dassault Systemes, шунингдек, етакчи Россия ишлаб чиқарувчилари – «Ростех» давлат корпорацияси, «Синара» гуруҳи, ЧҚПЗ, «Росатом» давлат корпорацияси, УТМК, «Цоллерс», «КамАЗ» ва бошқалар иштирок этади. Кўргазмага ҳар йили 70 мамлакатдан ўртача 50 мингга яқин меҳмон ташриф буюради.
Эслатиб ўтамиз, 2020 йилнинг декабрида Россия томонидан яратилган коронавирусга қарши «Спутник V» вакцинаси Ўзбекистонга Россия саноат ва савдо вазири Денис Мантуров олиб келган ва Тошкентнинг Янгиҳаёт туманида қурилган Тошкент металлургия заводининг ишга туширилишида иштирок этган эди.
Изоҳ (0)