Qoraqalpog‘iston Respublikasi va viloyatlarda 13 ta tuman innovatsion hududga aylantiriladi. Bu haqda 1-aprel kuni imzolangan “Ilmiy va innovatsion faoliyatni rivojlantirish bo‘yicha davlat boshqaruvi tizimini takomillashtirish to‘g‘risida”gi Prezident farmonida belgilandi.
Adliya vazirligi matbuot xizmatining ma’lum qilishicha, innovatsion hududga aylantiriladigan tumanlar ro‘yxatiga quyidagi tumanlar kiritilgan:
- Qoraqalpog‘iston Respublikasi Nukus tumani;
- Andijon viloyatining Marhamat tumani;
- Buxoro viloyatining Romitan tumani;
- Jizzax viloyati Do‘stlik tumani;
- Qashqadaryo viloyati Nishon tumani;
- Navoiy viloyati Karmana tumani;
- Namangan viloyati Chust tumani;
- Samarqand viloyati Urgut tumani;
- Sirdaryo viloyati Sirdaryo tumani;
- Surxondaryo viloyati Oltinsoy tumani;
- Toshkent viloyati Ohangaron tumani;
- Farg‘ona viloyati Oltiariq tumani;
- Xorazm viloyati Gurlan tumani.
Hujjatga muvofiq, hududlarda ilmiy va innovatsion faoliyatni rivojlantirish maqsadida vazirlik tizimida Qoraqalpog‘iston Respublikasi va viloyatlar innovatsion rivojlanish boshqarmalari tashkil etiladi.
Shuningdek, Innovatsion rivojlanish va novatorlik g‘oyalarini qo‘llab-quvvatlash jamg‘armasi unga Ilmiy va ilmiy-texnik faoliyat natijalarini tijoratlashtirish Prezident jamg‘armasi va Yoshlar akademiyasining iqtidorli yoshlarni qo‘llab-quvvatlash jamg‘armasini qo‘shib olish yo‘li bilan Ilm-fanni moliyalashtirish va innovatsiyalarni qo‘llab-quvvatlash jamg‘armasi etib qayta tashkil etiladi.
Barcha vazirlik va idoralar, mahalliy ijro etuvchi hokimiyat organlari, xo‘jalik birlashmalari, ustav fondida davlat ulushi 50 foiz va undan yuqori bo‘lgan yirik tashkilotlarda amaldagi rahbar o‘rinbosarlaridan biriga innovatsiyalarni joriy etish (Chief Innovation Officer) vazifasi yuklatiladi. Ularning bazaviy lavozim maoshiga har oyda 30 foiz miqdorida ustama to‘lanadi.
OTMning ilmiy va innovatsion faoliyatini baholash tizimi joriy qilinadi. Shunga ko‘ra, har yil yakuni bo‘yicha ilmiy tashkilotlarning hamda har o‘quv yili yakuni bo‘yicha OTMning ilmiy va innovatsion faoliyati baholanadi.
Baholash natijalariga ko‘ra, OTM va ilmiy tashkilotlar rahbarlariga nisbatan rag‘batlantirish yoki intizomiy jazolarni qo‘llash haqida tegishli vazirlik va idoralarga taqdimnoma kiritiladi.
Eslatib o‘tamiz, 2020-yilning dekabr oyida o‘tkazilgan videoselektor yig‘ilishida Shavkat Mirziyoyev tarmoqlarga ilm-fan va innovatsiyani joriy qilish bo‘yicha olib borilayotgan ishlarni tanqid qilgandi. Prezident ilm-fan va innovatsiyani rivojlantirish bo‘yicha yetarli natija ko‘rsata olmagan rektorlarga chora ko‘rish bo‘yicha ko‘rsatma bergan.
Izoh (0)