Қорақалпоғистон Республикаси ва вилоятларда 13 та туман инновацион ҳудудга айлантирилади. Бу ҳақда 1 апрель куни имзоланган «Илмий ва инновацион фаолиятни ривожлантириш бўйича давлат бошқаруви тизимини такомиллаштириш тўғрисида»ги Президент фармонида белгиланди.
Адлия вазирлиги матбуот хизматининг маълум қилишича, инновацион ҳудудга айлантириладиган туманлар рўйхатига қуйидаги туманлар киритилган:
- Қорақалпоғистон Республикаси Нукус тумани;
- Андижон вилоятининг Марҳамат тумани;
- Бухоро вилоятининг Ромитан тумани;
- Жиззах вилояти Дўстлик тумани;
- Қашқадарё вилояти Нишон тумани;
- Навоий вилояти Кармана тумани;
- Наманган вилояти Чуст тумани;
- Самарқанд вилояти Ургут тумани;
- Сирдарё вилояти Сирдарё тумани;
- Сурхондарё вилояти Олтинсой тумани;
- Тошкент вилояти Оҳангарон тумани;
- Фарғона вилояти Олтиариқ тумани;
- Хоразм вилояти Гурлан тумани.
Ҳужжатга мувофиқ, ҳудудларда илмий ва инновацион фаолиятни ривожлантириш мақсадида вазирлик тизимида Қорақалпоғистон Республикаси ва вилоятлар инновацион ривожланиш бошқармалари ташкил этилади.
Шунингдек, Инновацион ривожланиш ва новаторлик ғояларини қўллаб-қувватлаш жамғармаси унга Илмий ва илмий-техник фаолият натижаларини тижоратлаштириш Президент жамғармаси ва Ёшлар академиясининг иқтидорли ёшларни қўллаб-қувватлаш жамғармасини қўшиб олиш йўли билан Илм-фанни молиялаштириш ва инновацияларни қўллаб-қувватлаш жамғармаси этиб қайта ташкил этилади.
Барча вазирлик ва идоралар, маҳаллий ижро этувчи ҳокимият органлари, хўжалик бирлашмалари, устав фондида давлат улуши 50 фоиз ва ундан юқори бўлган йирик ташкилотларда амалдаги раҳбар ўринбосарларидан бирига инновацияларни жорий этиш (Chief Innovation Officer) вазифаси юклатилади. Уларнинг базавий лавозим маошига ҳар ойда 30 фоиз миқдорида устама тўланади.
ОТМнинг илмий ва инновацион фаолиятини баҳолаш тизими жорий қилинади. Шунга кўра, ҳар йил якуни бўйича илмий ташкилотларнинг ҳамда ҳар ўқув йили якуни бўйича ОТМнинг илмий ва инновацион фаолияти баҳоланади.
Баҳолаш натижаларига кўра, ОТМ ва илмий ташкилотлар раҳбарларига нисбатан рағбатлантириш ёки интизомий жазоларни қўллаш ҳақида тегишли вазирлик ва идораларга тақдимнома киритилади.
Эслатиб ўтамиз, 2020 йилнинг декабрь ойида ўтказилган видеоселектор йиғилишида Шавкат Мирзиёев тармоқларга илм-фан ва инновацияни жорий қилиш бўйича олиб борилаётган ишларни танқид қилганди. Президент илм-фан ва инновацияни ривожлантириш бўйича етарли натижа кўрсата олмаган ректорларга чора кўриш бўйича кўрсатма берган.
Изоҳ (0)