O‘zbekiston Ichki ishlar vazirligi tizimida har yili “Eng yaxshi hududiy ichki ishlar organi boshlig‘i”, “Eng yaxshi profilaktika inspektori”, “Eng yaxshi tergovchi”, “Eng yaxshi tezkor xodim” nominatsiyalari bo‘yicha respublika tanlovlari o‘tkaziladi. Bu haqda Ichki ishlar organlari tizimini yanada takomillashtirish bo‘yicha “Yo‘l xaritasi”da so‘z boradi.
O‘zbekiston Prezidenti 2021-yil 26-mart kuni “Jamoat xavfsizligini ta’minlash va jinoyatchilikka qarshi kurashish sohasida ichki ishlar organlari faoliyatini sifat jihatidan yangi bosqichga ko‘tarish chora-tadbirlari to‘g‘risida”gi PF-6196-sonli farmonni imzolagan. Mazkur hujjat orqali mamlakatda huquq-tartibot va qonuniylikni mustahkamlash, aholining tinchligi va osoyishtaligini ta’minlash maqsadida ichki ishlar organlari faoliyatini tashkil etishning mutlaqo yangi mexanizmlarini tashkil etish belgilangan.
Farmonga ilova sifatida keltirilgan “Yo‘l xaritasi”da 2021-yilning 25-mayiga qadar “Eng yaxshi hududiy ichki ishlar organi boshlig‘i”, “Eng yaxshi profilaktika inspektori”, “Eng yaxshi tergovchi”, “Eng yaxshi tezkor xodim” nominatsiyalari bo‘yicha respublika tanlovlarini tashkillashtirish belgilangan bo‘lib, unga ichki ishlar vaziri Po‘lat Bobojonov mas’ul etib tayinlangan.
Tanlovni o‘tkazishdan maqsad — sohaviy faoliyat bo‘yicha eng yaxshi xodimlarni aniqlashning har tomonlama, xolisona, oshkora mexanizmlari va mezonlarini joriy etishdan iborat. Eng yaxshi xodimlar har yili 25-oktabr — Ichki ishlar organlari xodimlari kunini nishonlash vaqtida e’lon qilinadi.
Budjetdan tashqari mablag‘lar hisobidan g‘oliblarni har oylik pul ta’minotining 100 foizigacha miqdorda bir yil davomida moddiy rag‘batlantirish tartibi joriy etiladi va eng yaxshi xodimlarning fotosuratlari va ular haqidagi ma’lumotlar bir yil davomida barcha ichki ishlar organlarida joylashtiriladi hamda ularning xizmat vazifalarini bajarish natijalari keng targ‘ib etiladi.