Rivojlangan mamlakatlar koronavirusga qarshi vaksinalarning 60 foizini sotib olgan, bu esa butun dunyoda vaksina tanqisligini keltirib chiqardi. Bu haqda Xitoy tashqi ishlar vaziri Van I o‘z intervyusida aytib o‘tdi, deb yozadi “RBK”.
“Dunyo aholisining 16 foizini o‘z ichiga olgan badavlat mamlakatlar vaksinalarning 60 foizini sotib olgan. Ba’zi rivojlangan mamlakatlar o‘z aholisidan ikki-uch baravar ko‘p miqdordagi preparatlarga buyurtma bergan”, — dedi vazir.
Uning fikriga ko‘ra, boy mamlakatlarning haddan ortiq xaridi rivojlanayotgan mamlakatlar uchun vaksinalarni sotib olishda muammo keltirib chiqargan. “Ko‘pgina davlatlarga hatto bir doza vaksinani topish ham mushkul masala”, — dedi Xitoy Tashqi ishlar vazirligi rahbari.
Van I ushbu holatni “vaksina millatchiligi” deb atadi va uning dunyo bo‘ylab tobora keng tarqalayotganini ta’kidladi.
Uning qo‘shimcha qilishicha, Xitoy 80 dan ortiq mamlakat va uchta xalqaro tashkilotga vaksina ishlab chiqarishda yordam beradi.
Avvalroq Kambag‘allik va kasalliklarga qarshi kurashish tashkiloti ONE Campaign hisobotida rivojlangan davlatlar koronavirusga qarshi vaksinalarni o‘z ehtiyojlaridan ortiq hajmda sotib olayotgani haqida aytib o‘tilgandi. Ta’kidlanishicha, fevral oyi oxiriga qadar AQSh, Yevropa Ittifoqi, Avstraliya, Kanada va Yaponiya 3 milliard doza koronavirusga qarshi vaksina sotib olgan, bu ushbu mamlakatlar aholisini emlash uchun 1 milliarddan ortiq doza hisoblanadi.
Avvalroq JSST rahbari Tedros Gebreyesus faqat COVAX dasturi yordamida dunyo bo‘ylab COVID-19’ga qarshi vaksinatsiyaning adolatli taqsimlanishini amalga oshirish mumkinligini ta’kidlagan edi.
Ma’lumot uchun, bungacha JSST COVID-19’ga qarshi kurashish uchun yangi loyihani salkam 2 milliard dollarga baholagan edi. Rejani to‘liq moliyalashtirish “global tiklanish uchun sarmoyadir”, dedi Tedros Gebreyesus.
Izoh (0)