AQSh koronavirus pandemiyasining to‘rtinchi to‘lqinini boshdan kechirmoqda. Bu haqda mamlakat prezidenti Jo Baydenning koronavirus bo‘yicha maslahat qo‘mitasi a’zosi, epidemiolog Maykl Osterxolm Fox News telekanalida ma’lum qildi, deb yozadi “RBK”.
Epidemiolog o‘z fikrini so‘nggi oylarda mamlakatda koronavirusning jiddiy xavf tug‘diradigan bir nechta yangi shtammlari paydo bo‘lgani bilan izohladi. “Fikrimcha, qaysidir ma’noda biz yangi pandemiyani deyarli boshdan o‘tkazyapmiz. Shu bilan birga, yaxshi yangilik shundaki, mavjud vaksinalar virusning yangi turlariga, shu jumladan, “britancha” shtammga qarshi samarali ta’sir ko‘rsatmoqda” — dedi Osterxolm.
Jons Hopkins universiteti ma’lumotlariga ko‘ra, AQShda pandemiya boshidan beri 30,7 milliondan ortiq odam koronavirus bilan kasallangan. Kasallanganlar sonining ko‘pligi bo‘yicha mamlakat dunyoda birinchi o‘rinda turadi. Mamlakatda 554 mingdan ortiq odam infeksiya qurboni bo‘lgan.
Jo Bayden prezidentlik lavozimiga kirishgan payt birinchi 100 kun ichida 100 million amerikalikni emlashni maqsad qilgan edi. Bayden prezidentligining 37 kuni mobaynida 50 million kishi COVID-19’ga qarshi emlandi.
Mart oyining oxirida Jo Bayden prezidentligining dastlabki 100 kunining oxirigacha, 200 million amerikalikning koronavirusga qarshi emlanishini va’da qildi. Ayni paytda Kasalliklarni nazorat qilish va oldini olish markazining (CDC) ma’lumotlariga ko‘ra, umumiy hisobda mamlakatda 106 million kishi (32%) emlangan, 61 million (18%) kishi ikkita dozani qabul qilgan.
Avvalroq Bayden mamlakatda COVID-19 bilan bog‘liq favqulodda holat rejimi uzaytirilganini ma’lum qilgandi.
Eslatib o‘tamiz, 23-fevral kuni Qo‘shma Shtatlarda koronavirus qurbonlari soni 500 ming kishidan oshdi. Shu munosabat bilan Bayden vafot etganlar uchun motam belgisi sifatida butun mamlakat bo‘ylab besh kunga bayroqlarni tushirishni buyurdi.
AQShda koronavirusdan vafot etganlar soni Birinchi va Ikkinchi jahon urushi hamda Vyetnam urushi paytida halok bo‘lganlarning umumiy sonidan oshib ketgan. The New York Times 21-fevral kungi sonining birinchi sahifasida koronavirus qurbonlari sonini anglatuvchi 500 mingta nuqtadan iborat grafik tasvirini chop etdi. Tasvir qurbonlar sonining o‘sish “tezligini” aks ettiradi.
Izoh (0)