Toshkentda to‘lov terminallarini o‘marib ketganlar 5 yilga qamaldi

Toshkent shahrida 7 dona to‘lov terminallarini mashinasiga yuklab olib ketish orqali o‘g‘irlab ketilgani xabar qilingandi. Ushbu jinoyatni sodir etgan shaxslarga nisbatan sud hukmi o‘qildi. Bu haqda “Hudud24.uz” ma’lum qildi.

Sud tergovida aniqlanishicha, ular jinoiy til biriktirib, 2020-yil 27-dekabr kuni Toshkent shahrining Yashnobod va Mirzo Ulug‘bek tumanlari hududida o‘rnatilgan jami qiymati 27 million 635 ming 850 so‘m bo‘lgan 2 dona bankomatni hamda ularning ichidan jami 4 million 963 ming so‘m pullarni o‘margan.

Bundan tashqari ular 2021-yil 2-yanvar kuni ham takroran jinoyat sodir etib, bir kun ichida Yashnobod tumanining ikki hududida va Mirzo Ulug‘bek tumani hududida joylashgan jami qiymati 62 million 635 ming 850 so‘m bo‘lgan 3 ta to‘lov terminalini hamda ularning ichidan jami 6 million 97 ming so‘m miqdoridagi pullarni o‘g‘irlagan.

Sud tergovida aniqlanishicha, sudlanuvchilar, avvalroq aytilganidek, 7 ta to‘lov terminalini emas, balki 5 ta to‘lov terminalini ichidagi pullari bilan o‘marib ketishgan.

Sud sudlanuvchilar, jabrlanuvchilarning ko‘rsatmalarini tinglab, dastlabki tergov jarayonida, sudda to‘plangan dalillarni tekshirib va muhokama qilib, jinoyat ishidagi hujjatlarni tahlil qilib, D. va R. ismli shaxslarni Jinoyat kodeksining 169-moddasi 3-qismining “a” bandi bilan aybli deb topib, ularga shu moddaga asosan 5 yil muddatga ozodlikdan mahrum etish jazosi tayinladi.

Sudlanuvchilardan jabrlanuvchilar foydasiga moddiy zarar solidar tartibda undirish belgilandi.

Bundan avval Andijonda bankomatlardan noqonuniy ravishda 345,5 mln so‘mni o‘zlashtirgan bank xodimiga jinoyat ishi ochilgani, Toshkentda to‘yi uchun 76 mln so‘m qarz olgan yigit bankomatlarni o‘margani hamda Toshkentda bankomatlarga joylashtirish uchun ajratilgan 2,3 milliard so‘mni o‘zlashtirgan bank xodimlari ushlangani haqida xabar berilgandi.