Buxoro viloyatining Qorako‘l tumanida yashovchi fuqaro bank boshqaruvchisiga kredit mablag‘larini tezroq chiqartirish uchun pora berayotganda qo‘lga olindi. Holat huquq-tartibot idorasi xodimlari hamkorligida o‘tkazilgan tezkor tadbirda aniqlandi, deya xabar berdi “Daryo” muxbiri.
Ta’kidlanishicha, Qorako‘l tumanidagi “Mirob” MFYda yashovchi fuqaro V.P. turmush o‘rtog‘i N.N.ning nomiga chorva mollari olish uchun kredit mablag‘larini tezroq chiqartirishni ko‘zlab, AT “Agrobank” Qorako‘l tuman filiali boshqaruvchisi bilan kelishishni reja qilgan. Mas’ul fuqaroga barcha hujjatlar tayyor bo‘lgach, kredit ajratish masalasi muammosiz hal bo‘lishini tushuntirishiga qaramasdan, fuqaro kredit mablag‘larini tezroq chiqartirishni so‘ragan va unga pora tariqasida 100 dollar bergan. Va shu paytda tuman IIB va departamentning tuman bo‘limi xodimlari hamkorligida o‘tkazilgan tezkor tadbir vaqtida qo‘lga olingan.
Mazkur holat yuzasidan Iqtisodiy jinoyatlarga qarshi kurashish departamentining Qorako‘l tumani bo‘limi tomonidan fuqaro V.P.ga nisbatan Jinoyat kodeksining 211-moddasi 1-qismi (pora berish) bilan jinoyat ishi qo‘zg‘atilgan. Ayni paytda surishtiruv ishlari boshlab yuborilgan.
Qayd etish lozimki, ushbu modda bilan ayblangan fuqaroning aybi tasdiqlansa, u bazaviy hisoblash miqdorining ellik baravaridan yuz baravarigacha miqdorda jarimaga tortilishi yoki ikki yildan besh yilgacha ozodlikni cheklash yoxud besh yilgacha ozodlikdan mahrum qilish bilan jazolanishi mumkin.
Izoh (0)