Тошкент шаҳрида 7 дона тўлов терминалларини машинасига юклаб олиб кетиш орқали ўғирлаб кетилгани хабар қилинганди. Ушбу жиноятни содир этган шахсларга нисбатан суд ҳукми ўқилди. Бу ҳақда «Hudud24.uz» маълум қилди.
Суд терговида аниқланишича, улар жиноий тил бириктириб, 2020 йил 27 декабрь куни Тошкент шаҳрининг Яшнобод ва Мирзо Улуғбек туманлари ҳудудида ўрнатилган жами қиймати 27 миллион 635 минг 850 сўм бўлган 2 дона банкоматни ҳамда уларнинг ичидан жами 4 миллион 963 минг сўм пулларни ўмарган.
Бундан ташқари улар 2021 йил 2 январь куни ҳам такроран жиноят содир этиб, бир кун ичида Яшнобод туманининг икки ҳудудида ва Мирзо Улуғбек тумани ҳудудида жойлашган жами қиймати 62 миллион 635 минг 850 сўм бўлган 3 та тўлов терминалини ҳамда уларнинг ичидан жами 6 миллион 97 минг сўм миқдоридаги пулларни ўғирлаган.
Суд терговида аниқланишича, судланувчилар, аввалроқ айтилганидек, 7 та тўлов терминалини эмас, балки 5 та тўлов терминалини ичидаги пуллари билан ўмариб кетишган.
Суд судланувчилар, жабрланувчиларнинг кўрсатмаларини тинглаб, дастлабки тергов жараёнида, судда тўпланган далилларни текшириб ва муҳокама қилиб, жиноят ишидаги ҳужжатларни таҳлил қилиб, Д. ва Р. исмли шахсларни Жиноят кодексининг 169-моддаси 3-қисмининг «а» банди билан айбли деб топиб, уларга шу моддага асосан 5 йил муддатга озодликдан маҳрум этиш жазоси тайинлади.
Судланувчилардан жабрланувчилар фойдасига моддий зарар солидар тартибда ундириш белгиланди.
Бундан аввал Андижонда банкоматлардан ноқонуний равишда 345,5 млн сўмни ўзлаштирган банк ходимига жиноят иши очилгани, Тошкентда тўйи учун 76 млн сўм қарз олган йигит банкоматларни ўмаргани ҳамда Тошкентда банкоматларга жойлаштириш учун ажратилган 2,3 миллиард сўмни ўзлаштирган банк ходимлари ушлангани ҳақида хабар берилганди.
Изоҳ (0)