O‘zbekiston Prezident Administratsiyasi huzuridagi Axborot va ommaviy kommunikatsiyalar agentligi Ichki ishlar vazirligi matbuot xizmati bilan birgalikda @stopnarko_bot Telegram-botini ishga tushirdi. U orqali giyohvand moddalar reklamasi haqida xabar berish mumkin. Bu haqda Gazeta.uz yozmoqda.
AOKA xabariga ko‘ra, endi fuqarolar reklama joylashgan manzil haqidagi ma’lumot yoki uning lokatsiyasini botga yo‘llashi mumkin. Bu orqali ichki ishlar organlari xabardor qilinadi va reklama o‘chiriladi.
So‘nggi yillarda giyohvand moddalar to‘g‘risida reklama vaqti-vaqti bilan Toshkentning turli tumanlarida paydo bo‘lmoqda. Yaqinda “Potrebitel.uz” internet-hamjamiyati bunday reklamalar tobora ko‘payib borayotgani haqidagi xabarni e’lon qildi. Asosan Chilonzor, Uchtepa va Mirzo Ulug‘bek tumanlarida bunday holatlar kuzatilayotgani aytilmoqda.
“Biz reklama qilingan kanallarni ko‘rdik — u yerda hamma narsa ochiq, batafsil va narxlari bilan. Bundan tashqari, Toshkentda tarqatuvchi sifatida ishlash uchun ko‘plab takliflar mavjud. Kanallarning 9-10 ming obunachisi bor. Ular giyohvand moddalarni sotgani uchrashuvga kelishmaydi. Pul elektron o‘tkazma orqali qabul qilinadi, so‘ngra tumanning biror-bir joyida belgi qo‘yiladi va Telegram’da dozani qayerdan olish kerakligi ma’lum qilinadi. Shuning uchun yoshlar shahar bo‘ylab belgilarni qo‘yish uchun yollanadilar”, — deyiladi xabarda.
Ba’zi joylarda aholining o‘zi yozuvlarni bo‘yagan va ijtimoiy tarmoqlar orqali huquqni muhofaza qiluvchi organlariga xabar qilinganida mahalliy profilaktika inspektoriga murojaat qilishlari so‘ralgan.
Jamiyat ma’muriyati huquqni muhofaza qilish organlarini “shoshilinch ravishda Telegram-bot yaratishga”, deputatlarni esa aholi turar joylarida doimiy reydlar tashkil etishga chaqirgan.
Bundan avval Yakkasaroyda sigaretalarga giyohvand moddalar o‘rab olgan shaxs ushlangani, Toshkentda qariyb 100 mln so‘mlik kuchli ta’sir qiluvchi dori vositalarining noqonuniy aylanmasiga chek qo‘yilgani hamda Farg‘onada uyida giyohvand modda saqlab kelgan shaxsga nisbatan jinoyat ishi qo‘zg‘atilgani haqida xabar berilgandi.
Izoh (0)