Farg‘ona viloyatining Rishton tumanidan Qirg‘iziston hududi orqali So‘xga boruvchi yo‘lning tantanali ochilish marosimi bo‘lib o‘tdi. Bu haqda tadbirda qatnashgan “Daryo” muxbiri Azizjon Ermatov xabar berdi.
Ta’kidlanishicha, Farg‘ona viloyati bojxona boshqarmasi tasarrufidagi “Rishton” va “Tul” chegara bojxona postlari barcha fuqarolar hamda yengil avtomashinalar harakati uchun to‘liq ochilgan.
Ochilish marosimida Farg‘ona viloyati hokimi Xayrulla Bozorov, Botken viloyati gubernatori Omurbek Suvonaliyev va ikki mamlakatning bir qator rasmiy shaxslari ishtirok etdi.
Marosimda so‘z olgan rasmiylar tomonidan davlat rahbarlarining tashabbuslari va amaliy sa’y-harakatlari bilan O‘zbekiston va Qirg‘iziston o‘rtasida aloqalar kengayib borayotgani, chegaraoldi hududlarning hamkorligi ham yangi bosqichga ko‘tarilayotgani ta’kidlanib, prezidentlarga chin qalbdan minnatdorlik bildirildi.
“Ikki qo‘shni mamlakat aholisi azaldan qarindosh-urug‘, quda-anda, do‘st-birodar bo‘lib, juda ham ahillikda yashab kelgan. Bugungi tarixiy sana ham mana shu azaliy qardoshlik aloqalarimizning yana bir tantanasi, desak to‘g‘ri bo‘ladi. Qirg‘izistonning Botken viloyati Qadamjoy tumani orqali Rishtondan So‘xga boriladigan yo‘lning ochilish masalasi qariyb o‘n yildan beri ikki tomon xalqlarining orzusi bo‘lib kelgan edi. Albatta, bu ham o‘z-o‘zidan bo‘lgani yo‘q. Ko‘p yillar bunga harakat qilingan. Ikki davlat rahbarlarining qat’iy siyosiy irodasi natijasida bu yo‘l ochilyapti. Ikki davlat prezidentlarining 11—12-mart kunlari Toshkent shahrida bo‘lib o‘tgan oliy darajadagi uchrashuvlarida erishilgan kelishuvlar natijasini tez va qisqa muddatda guvohi bo‘lib turibmiz.
Bu yo‘lning ochilishi nafaqat qarindosh-urug‘chilik, do‘stligimiz rivojlanishiga, balki iqtisodiy aloqalarimiz mustahkamlanishiga ham asos bo‘ladi. Qirg‘iziston Farg‘ona viloyatining eng yaqin savdo hamkori hisoblanadi. O‘tgan yili ikki tomonlama savdo aylanmasi 118 million bo‘lgan bo‘lsa, bu yil 200 million dollarga yetkazishga kelishganmiz. Ikki yil ichida qo‘shma korxonalar sonini ikki barobarga oshirishni rejalashtirganmiz. Xudo xohlasa, Farg‘ona, Botken viloyatlarini o‘zbek–qirg‘iz munosabatlarida eng namunali hududga aylantiramiz”, — dedi viloyat hokimi Xayrulla Bozorov.
Ma’lumot uchun, 2013-yil yanvar oyida sodir bo‘lgan voqealar oqibatida Farg‘ona viloyatining So‘x tumaniga olib boruvchi Rishton yo‘li yopilib, “Vodil” posti yagona qatnov yo‘li hisoblanardi.
So‘x tumani aholisi 8 yildan ortiq vaqt davomida viloyat markaziga kelish uchun soatlab vaqt sarflab, “Vodil” bojxona chegara posti orqali qatnagan.
Rishton—So‘x hududlarni bog‘lovchi qisqa yo‘l hisoblanadi. 35 kilometrlik bu yo‘l yopiqligi sabab so‘xliklar viloyat markaziga borish uchun 125 kilometr yo‘lni bosib o‘tishiga to‘g‘ri kelayotgandi. Yo‘lning ochilishi natijasida Farg‘onaga olib boruvchi yo‘l qariyb 90 kilometrga qisqardi.
80 mingga yaqin aholi istiqomat qiluvchi So‘x anklav hudud hisoblanib, tumanga faqat Qirg‘iziston Respublikasi Botken viloyati orqali boriladi.
2019-yilning 30-avgustida ham Rishton—So‘x yo‘lining ochilish marosimi bo‘lib o‘tgandi, ammo ikki kun o‘tib yo‘l yana yopilgani ma’lum qilingandi. Keyinchalik O‘zbekiston bosh vaziri Abdulla Aripov yo‘lning yopilishi Yevrosiyo iqtisodiy ittifoqi talablari bilan bog‘liq ekanligini tushuntirgandi.
Eslatib o‘tamiz, qo‘shni Qirg‘iziston prezidenti Sadir Japarov 11—12-mart kunlari O‘zbekistonga tashrif bilan keldi. Keyinroq 24—25-mart kunlari O‘zbekiston—Qirg‘iziston chegarasini delimitatsiya va demarkatsiya qilish bo‘yicha qirg‘iz hukumati delegatsiyasi ham Toshkentda bo‘ldi.
Ushbu tashrif yakunida O‘zbekiston va Qirg‘iziston bahsli chegara hududlarni xatlovdan o‘tkazishga kelishib olgan.
“Yo‘lning ochilishi tumanimizda katta tantana, xursandchilikka sabab bo‘ldi. Bu kunlarni necha yillardan beri orzu qilardik. Mana bugun biz orzu qilgan kunlar keldi. So‘x tumanining Tul qishlog‘ida qarindoshlarimiz bor. Ularni ko‘rmaganimizga ham uzoq yillar bo‘lib ketdi. Yarim soatlik yo‘lga kunlar davomida aylanib borishga majbur edik. Bugun yo‘limiz ochilsa, mana shu qiyinchiliklar ortda qoladi. Xudo xohlasa, qarindoshlar bilan ko‘rishish nasib etadi. O‘zbeklar va qirg‘izlar ming yillik do‘st. Ular quda-anda bo‘lib ketgan. Mehmondo‘st xalqmiz. Endi ularnikiga mehmonga boramiz. Ular kelishsa, biz ham ochiq chehra bilan kutib olamiz”, — dedi Rishton tumani “Qoshqaron” mahallasida yashovchi Maqsuda Ergasheva.
“Yo‘l ochilganidan bitta men emas, hamma xursand, hamma rozi. Bugun biz uchun katta bayram bo‘ldi. Sababi yo‘l yopilib, 8-9 yildan beri bu tomonlarga o‘tganimiz yo‘q. Do‘stlar, birodarlar bir-birimizni ko‘rolmay qolgandik. Ilgari bir kunda o‘n martadan o‘tardik. Qardoshlarimizning to‘ylarida mehmon bo‘lardik. Bir-birimizning bozorlarimizga borib, savdo qilardik. Yo‘lning ochilishi tadbirkorlar uchun ham ko‘p qulayliklar beradi. Qarindoshlarimiz, qudalarimiz, jiyanlarimiz bor. Nasib qilsa, ularnikiga borib, mehmon bo‘lamiz”, — dedi Rishton tumani Oqtomir qishlog‘ida yashovchi Xursanali Toshmatov.
Izoh (0)