Namanganda somsa tayyorlash uchun olib ketilayotgan 200 kg iste’molga yaroqsiz go‘sht aniqlandi (video)

Namangan viloyati Norin tumanida 200 kilogramm yaroqsiz go‘sht aniqlandi. Bu haqda “Zamon” informatsion dasturida xabar qilindi.

Ma’lum qilinishicha, 2021-yil 29-mart kuni Norin tumani hududida Andijondan Namanganga “VAZ-2106”da olib kelinayotgan iste’molga yaroqsiz, jami og‘irligi 200 kilogramm go‘sht mahsulotlari aniqlandi.

Ushbu go‘sht mahsulotlari kelib chiqishi noma’lum bo‘lgan hayvon ichki organlari va tuyoqlaridan iborat bo‘lgan.

Hujjatlarsiz olib ketilayotgan go‘sht mahsulotlari huquqni muhofaza qiluvchi organlar xodimlarida shubha uyg‘otib, tekshirib ko‘rish uchun Namangan viloyati Hayvonlar kasalliklari, tashxisi va oziq-ovqat mahsulotlari xavfsizligi bo‘limiga olib borilgan.

Bakteriologik tekshiruvda go‘sht mahsulotining iste’molga yaroqsiz ekanligi aniqlangan.

Surishtiruv jarayonida ushbu go‘sht mahsulotlari somsa tayyorlash uchun olib ketilayotgani aniqlangan. Ayni paytda holat yuzasidan tergov-surishtiruv ishlari olib borilmoqda.

Bundan avval Qashqadaryoda iste’molga yaroqsiz 800 kg go‘shtni mashina saloni va yukxonasida olib ketayotgan shaxslar aniqlangani, Farg‘onada mushuk go‘shtini sotganlar ushlangani to‘g‘risidagi xabarlar rad etilgani hamda Navoiyda sanitariya qoidalarini buzgan holda 15 bosh qo‘y go‘shtini Toshkentga olib kelayotgan Cobalt haydovchisi jarimaga tortilgani haqida xabar qilingandi.