Тошкент шаҳри Яккасарой туманида сигареталарга гиёҳванд моддалар ўраб олган шахс қўлга олинди, дея хабар қилмоқда Тергов департаменти.
Қайд этилишича, 2021 йилнинг 29 март куни Яккасарой тумани бўйича ИИО ФМБ ЖҚБ ходимлари томонидан тезкор тадбир ўтказилган. Қушбеги мавзесида жойлашган «Дунё» ресторани олдида 23 ёшли Б.А. тўхтатилиб, унинг ёни холислар иштирокида кўздан кечирилган вақтда 7 дона Parliament сигаретасига қўлбола усулда ўралган ўзига хос ўткир ҳидли моддалар борлиги аниқланиб, ашёвий далил тариқасида расмийлаштириб олинган.
Суд кимёвий экспертиза хулосасида Б.А.дан олинган 7 дона сигаретада жами вазни 2,71 грамм никотин ва ADB-Butinaca гиёҳвандлик моддаси ўралган ҳолда эканлиги кўрсатилган.
Мазкур ҳолат юзасидан Яккасарой тумани бўйича ИИО ФМБ ҳузуридаги тергов бўлинмаси томонидан Жиноят кодексининг 276-моддаси 2-қисми «а» банди (гиёҳвандлик воситалари, уларнинг аналоглари ёки психотроп моддаларни ўтказиш мақсадини кўзламай қонунга хилоф равишда тайёрлаш ва сақлаш) билан жиноят иши қўзғатилган.
Ҳозирда тергов ҳаракатлари олиб борилмоқда.
Бундан аввал Тошкентда қарийб 100 миллион сўмлик кучли таъсир қилувчи дори воситаларининг ноқонуний айланмасига чек қўйилгани, Фарғонада уйида гиёҳванд модда сақлаб келган шахсга нисбатан жиноят иши қўзғатилгани ҳамда Андижонда гиёҳванд моддаларни оёқ кийимга яшириб ўтмоқчи бўлганлар қўлга тушгани ҳақида хабар берилганди.
Изоҳ (0)