Сирдарё вилояти Мирзаобод туманида Аҳмад ал-Фарғоний номидаги физика фанига ихтисослаштирилган таянч мактабининг очилиш маросими бўлиб ўтди. Бу ҳақда вилоят матбуот хизмати хабар берди.
Тантанали очилиш маросимида вилоят ҳокими Ғофуржон Мирзаев, халқ таълими вазири Шерзод Шерматов, туман сектор раҳбарлари, маҳалла фаоллари ҳамда кенг жамоатчилик вакиллари иштирок этди.
Тадбирни вилоят ҳокими Ғофуржон Мирзаев кириш сўзи билан очди.
«Мазкур зиё маскани мирзаободликларнинг талаб ва истакларидан келиб чиққан ҳолда физика фанига ихтисослаштирилди. Таянч мактабининг барпо этилиши ва замонавий жиҳозланиши баркамол авлодга кўрсатилаётган доимий ғамхўрлик ифодасидир. Таълим муассасаси нафақат замонавий қиёфага, балки мустаҳкам моддий-техника базасига эга бўлди», — деди вилоят ҳокими Ғофуржон Мирзаев.
Аҳмад ал-Фарғоний номидаги таянч мактаби тўрт қаватли қилиб қурилган бўлиб, 330 ўринга мўлжалланган. Бўлажак физиклар мактабида 23 та ўқув хонаси, 4 та хорижий тиллар, ахборот технологиялари хонаси, кимё, биология, физика лаборатория хоналари, 1 та очиқ спорт майдони ҳамда замонавий кутубхона сифатли таълим-тарбия жараёнларини ташкил этишга хизмат қилади.
Мактабга ташриф давомида вилоят ҳокими Ғофуржон Мирзаев ўқувчиларга физика фанидан маҳорат дарси ўтиб берди. Маҳорат дарси тугагандан сўнг Халқ таълими вазири Шерзод Шерматов вилоят ҳокимига ишора қилиб, «Мана кўрдингларми, физикани билган одам вилоят ҳокими бўлади», — деб ҳазил қилди.
«Физика керакли фан. Бу фандан бутун табиатни ўрганасизлар», – деб гапини давом эттирди вазир.
Изоҳ (0)