IIV YHXBB axborot xizmati ijtimoiy tarmoqlarda “GAIning duxini sindirish bo‘yicha master-klass” sarlavhasi ostida tarqalgan videolavha yuzasidan ma’lumot berdi.
Ma’lum qilinishicha, 31-mart kuni Toshkent viloyati IIBB YHXB YPX xodimi A.Abdurahimov 4R6 Toshkent—Chimyon avtomobil yo‘lining 17-kilometrida haydovchi, 1988-yilda tug‘ilgan A.S. boshqaruvidagi DAF TE 105 XF rusumli yuk avtomobilini to‘xtatgan. Bunga yuk mashinasi svetoforning taqiqlovchi qizil chirog‘ida harakatlangani sabab bo‘lgan va qoidabuzarlik bo‘yicha belgilangan tartibda bayonnoma rasmiylashtirgan.
O‘zaro muloqot vaqtida haydovchi bayonnoma tuzilganidan g‘azablanib, yerdan qo‘liga qattiq jism olib, u bilan urish niyatida inspektorni qo‘rqitmoqchi bo‘lgan.
Mazkur holat atrofdagi fuqarolar tomonidan tasvirga olingan va ijtimoiy tarmoqlarda tarqatilgan.
Ta’kidlanishicha, holat yuzasidan Toshkent viloyati IIBB YHXB tomonidan surishtiruv harakatlari olib borilmoqda.
Avvalroq Toshkentda qoidabuzar avtoblogerni chora ko‘rmay qo‘yib yuborgan YPX xodimi va uning boshlig‘iga chora ko‘rilgani to‘g‘risida xabar berilgandi.
Izoh (0)