“Barcha bemorlarni poytaxtga jo‘natish kerak emas” — Shavkat Mirziyoyev

O‘zbekiston Prezidenti raisligida 1-aprel kuni aholi salomatligini saqlash va koronavirusga qarshi kurashish borasida amalga oshirilayotgan ishlar hamda kelgusidagi ustuvor vazifalar muhokamasi yuzasidan videoselektor yig‘ilishi o‘tkazildi. “Gazeta.uz”ning yozishicha, Shavkat Mirziyoyev ushbu yo‘nalishda qo‘yilgan vazifalarni nazorat qilishi uchun qator rahbarlarni viloyatlarga biriktirgan.

Rahbarlar 1-mayga qadar Sirdaryo viloyati hamda 26 ta tuman va shahar tajribasini respublikaning barcha hududlarida boshlash kerak. Bunda, qishloq va mahallalarda tibbiyot brigadalarini tashkil etib, tibbiy xaritalarni shakllantirish, aholini 4 ta xavf guruhlariga ajratib, manzilli ko‘rikdan o‘tkazish va davolash ishlarini tashkil qilishi zarur.

Prezidentning ma’lum qilishicha, Jismoniy tarbiya va sport vazirligini boshqarish vazifasi yuklangan bosh vazir o‘rinbosari Aziz Abduhakimov kompleksi birinchi va ikkinchi xavf guruhiga kiradigan aholining (sog‘lom va nosog‘lom turmush tarzini olib borayotgan) faoliyatiga javob beradi.

Jismoniy tarbiya va sport vazirining o‘rinbosari Avaz Karimov sport instruktorlarini taqsimlab, aholi o‘rtasida ommaviy gimnastikani tashkil etishi kerak.

Sog‘liqni saqlash vaziri Abduhakim Xojiboyev uchinchi va to‘rtinchi guruh bilan ishlaydi (bemorlar va parvarishga muhtoj shaxslar yoki nogironligi bo‘lgan fuqarolar).

“Bu masalada Namangan tajribasini keng qo‘llash zarur, barcha bemorlarni poytaxtga yuborish emas, balki ularning yashash joylarida ixtisoslashgan tibbiy yordam olishiga sharoit yaratish kerak… Oldinlari Toshkentdagi markazga 5 ming kishi navbatda turadi deyishgandi, ularning barchasi viloyatdan kelganlar. Bu bizda tizim yo‘qligidan dalolat”, — deydi davlat rahbari.

Misol sifatida keltirilgan Namangan viloyatida tibbiyot xodimlari 763 ta mahallada 37 ming kishini tibbiy ko‘rikdan o‘tkazgan. Ularning 22 ming nafari uchun ambulator davolash tashkillashtirilgan, 4,5 ming nafariga viloyatlar, tuman va shahar tibbiyot muassasalarida statsionar davolanish belgilangan.

Prezidentning so‘zlariga ko‘ra, yaqin kunlarda viloyat sog‘liqni saqlash boshqarmasi boshliqlari Toshkentga davolanish uchun kelgan bemorlarni qaytarishni nazarda tutuvchi tizimni joriy etish rejalashtirilmoqda.

“Chunki har bir viloyatda sharoit yaratyapmiz. Toshkentdagi mutaxassislar joylardagi tibbiyot xodimlariga o‘rgatmoqda. Bemorlarga qiyinchilik tug‘dirishni to‘xtatish vaqti keldi”, — deydi u.

2020-yilda ixtisoslashgan markazlarda davolanishga muhtoj bo‘lgan 84 ming bemorning 51 mingi (61 foizi) bepul order olgan.

Moliya vazirligiga orderlar uchun ajratmalarni 2021-yilda 1,5 baravar oshirish va qo‘shimcha 80 milliard so‘m ajratish (250 milliard so‘mgacha yetkazish) bo‘yicha topshiriq berilgan.

Sog‘liqni saqlash vazirligiga 2021-yil oxiriga qadar hokimliklar bilan hamkorlikda har bir bemorni aniq joyi va davolanish muddatini ko‘rsatgan holda davolashni tashkillashtirish vazifasi qo‘yildi. Ixtisoslashgan tibbiyot markazlari qisqa muddatli kurslarda 3 mingdan ortiq oilaviy shifokorlarni o‘qitadi.