1-aprel kuni qayta tiklanuvchi energiya manbalarini rivojlantirish bo‘yicha yetakchi xalqaro kompaniyalardan biri bo‘lgan BAAning Masdar kompaniyasi tomonidan Navoiy viloyatining Zarafshon shahrida shamol elektr stansiyasi qurilishiga tamal toshi qo‘yildi. Bu haqda Energetika vazirligi xabar berdi.
Tadbir doirasida Masdar kompaniyasi, Investitsiyalar va tashqi savdo vazirligi hamda O‘zbekiston Energetika vazirligi o‘rtasida qurilayotgan elektr stansiyasining loyihaviy quvvatini 500 megavattdan 1,5 gigavattgacha oshirish bo‘yicha bitim imzolangan.
Dastlab 600 million dollarga baholangan loyiha kengaytirilgandan so‘ng qariyb 1,8 milliard dollar miqdorida to‘g‘ridan to‘g‘ri xorijiy investitsiyalarni jalb etishi kutilmoqda.
Zarafshondagi shamol elektr stansiyasi 2024-yilning oxirigacha tijoriy foydalanishga topshirilishi kutilmoqda. 500 megavatt quvvatga ega loyiha 500 mingta xonadonga yetarli hajmda elektr energiyani ishlab chiqarishni va atmosferaga chiqariladigan karbonat angidrid chiqindilarini yiliga 1,1 million tonnaga kamaytirishni ta’minlab berishi ko‘zda tutilgan edi. Endilikda bu raqamlar mos ravishda 1,5 million xonadon va 3,3 million tonna karbonat angidridga ko‘payadi.
Eslatib o‘tamiz, 2020-yilda Masdar kompaniyasi O‘zbekiston hukumati bilan Navoiy viloyatining Zarafshonda quvvati 500 MVt bo‘lgan Markaziy Osiyodagi eng yirik shamol elektr stansiyasi loyihasini ishlab chiqish, uni qurish va undan foydalanish bo‘yicha ikki tomonlama bitimlar imzolagan. Stansiya kompaniyaning muqobil energetika sohasida mintaqadagi ikkinchi loyihasi bo‘ladi.
Mavzuga doir: Sirdaryoda tabiiy gazni ikki barobar iqtisod qilgan holda elektr energiyasi ishlab chiqaradigan IES qurilishi boshlandi
Izoh (0)