Avtomobillar harakati uchun 20-aprelgacha yopilgani aytilgan “Qo‘yliq” ko‘prigidagi bugungi holat (foto)

Toshkent shahar hokimligi matbuot xizmati Qo‘yliq dahasidagi ko‘prik 20 kunga yopiladi, deya xabar bergan edi. 

Yo‘l ta’mirlash ishlari sababli 2021-yil 1-aprelidan 20-apreliga qadar Farg‘ona yo‘li ko‘chasidagi Qo‘yliq ota maqbarasidan Bektemir shoh ko‘chasiga chiquvchi ko‘prik harakatlanish uchun yopilishi aytilgan. Haydovchilarga aylanma yo‘llardan foydalanish tavsiya etilgan va noqulayliklar uchun uzr so‘ralgan edi. Biroq shunga qaramasdan, bu yerda uzundan uzun tiqilinchlar, avtomobillarning ko‘prik ustiga chiqishga intilayotganini kuzatish mumkin.

“Daryo” fotomuxbiri ushbu hududda bo‘lib, ta’mirlash ishlari jarayoni bilan tanishdi. Suratlarda ko‘rinib turganidek, ayni vaqtda ko‘prik chetidagi to‘siqlarning ayrimlari olingan, qatnov qismining bir tomoni, aynan to‘siqlar olingan joylari harakat uchun to‘liq cheklangan. Biroq uning yonidan ikki tomondan ham ayrim avtomobillar harakatlanmoqda.

Eslatib o‘tamiz, bundan avval Toshkentdagi Ahmad Donish ko‘chasi “karmashka” yo‘llarining bir qismi 1 oy muddatga yopilgani hamda Toshkentning 10 ta markaziy ko‘chasida pulli avtomobil to‘xtash joylari tarmog‘i paydo bo‘lishi haqida xabar berilgandi.