Toshkent shahri Mirzo Ulug‘bek tumanidagi Yadro fizikasi instituti joylashgan Ulug‘bek shaharchasida 1-aprel kuni fizikaga ixtisoslashgan tayanch maktabining rasmiy ochilish marosimi bo‘lib o‘tdi, deya xabar bermoqda Xalq ta’limi vazirligi.
Qayd etilishicha, maktabga Fanlar akademiyasining Yadro fizikasi ilmiy-tadqiqot instituti hamda O‘zbekiston Milliy universitetining fizika fakulteti biriktirilgan. Tadbirda universitet vakillari ishtirok etib, maktabda yaratilgan sharoitlar bilan tanishdi. Kelgusida ular o‘quvchilarga fizika fanidan amaliy bilim berish uchun hamkorlik qilishi rejaga kiritilgan. Fizik olimlar tomonidan mazkur maskan tayanch maktabga aylantiriladi.
Ma’lum qilinishicha, mazkur maktab 2021-yilda mukammal ta’mirlanib, o‘quvchilar uchun munosib sharoitlar yaratildi, fizika fanidan zamonaviy laboratoriya jihozlari (STEAM laboratoriya) bilan ta’minlandi.
Ta’lim maskanining ochilish marosimida Xalq ta’limi vazirligi, Fanlar akademiyasining Yadro fizikasi ilmiy-tadqiqot instituti, O‘zbekiston Milliy universiteti, tuman xalq ta’limi bo‘limi hamda ommaviy axborot vositalari vakillari, shuningdek, maktab pedagogik jamoasi va o‘quvchilar ishtirok etdi.
O‘zbekiston Prezidentining 2021-yil 19-martdagi “Fizika sohasidagi ta’lim sifatini oshirish va ilmiy-tadqiqotlarni rivojlantirish chora-tadbirlari to‘g‘risida”gi qarori bilan 28 ta tayanch va 175 ta fizika fani chuqurlashtirib o‘qitiladigan maktab (sinf)lar tashkil etilishi belgilangan bo‘lib, bunday maktablarni mamlakatning har bir viloyatida tashkil etish ko‘zda tutilgan.
Ta’kidlanishicha, maktab investitsiya dasturi asosida Xalq ta’limi vazirligi huzuridagi “Injiniring kompaniyasi” DUK buyurtmachiligi asosida yangicha dizayn bilan mukammal ta’mirdan chiqarilgan bo‘lib, loyiha quvvati 1176 o‘ringa mo‘ljallangan 4 qavatli binoni o‘z ichiga oladi.
Maktabda 45 ta o‘quv xonasi, 8 ta xorijiy tillar, 2 ta axborot texnologiyalari xonasi, 1 ta kimyo, biologiya, fizika laboratoriya xonalari, 5 ta muhim tashabbus doirasida to‘garak xonalari, 219 o‘rinli faollar zali, 1 ta sport zali, 3 ta ochiq sport maydoni, 2 ta texnologiya xonasi, musiqa xonasi, zamonaviy kutubxona va tibbiyot hamda bolalar tish shifokori xonasi, 128 o‘rinli oshxona, o‘qituvchilar uchun alohida xonalar tayyorlanib, to‘liq jihozlangan.
Bundan avval Qashqadaryoda bo‘lajak kelin-kuyovlarni oilaviy hayotga tayyorlash maktabi ish boshlagani, Mirzo Ulug‘bek, Chilonzor va Yunusobod tumanlaridagi maktablarda ta’lim 1-apreldan an’anaviy tarzda davom etishi hamda Toshkent shahar hokimligi koronavirusga chalinish holatlari ko‘paygan tumandagi maktablarni onlayn ta’lim shakliga o‘tkazishi mumkinligi haqida xabar berilgandi.
Izoh (0)