Farg‘ona viloyatida YPX inspektoriga 400 dollar pora taklif qilib, 300 dollarini bergan haydovchi qo‘lga olindi. Bu haqda “Daryo”ga viloyat IIB axborot xizmati xabar berdi.
Ma’lum qilinishicha, 2021-yilning 25-mart kuni viloyat IIB YHXB xodimi tomonidan Nexia avtomashinasini mast holda boshqargan 1978-yilda tug‘ilgan fuqaro I.T.ga nisbatan ma’muriy bayonnoma tuzilib, avtomashina jarima maydonchasiga vaqtincha saqlash uchun joylashtirilgan.
Shundan so‘ng fuqaro I.T. Qo‘qon shahar IIO FMB YHXBning ma’muriy huquqbuzarlik materiallarini ko‘rib chiqish bo‘yicha inspektori I.O.ga murojaat qilib, o‘ziga nisbatan rasmiylashtirilgan ma’muriy bayonnomani sudga yubormaslik va ijobiy hal qilib berish evaziga 400 dollar pora taklif qilgan.
Inspektor fuqaroni pora berish jinoyat ekanligi haqida bir necha marotaba ogohlantirib, bu yo‘ldan qaytarishga harakat qilgan bo‘lishiga qaramay, fuqaro pora taklif qilishda davom etgan.
Shundan so‘ng YPX xodimi mazkur holat yuzasidan IIB boshlig‘i nomiga bildirgi orqali murojaat qilib, fuqaro I.T.ga nisbatan belgilangan tartibda chora ko‘rilishini so‘ragan.
29-mart kuni inspektorning bildirgisi asosida holat yuzasidan IIV O‘XB Farg‘ona viloyati bo‘yicha bo‘limi hamda huquqni muhofaza qiluvchi idoralar xodimlari bilan hamkorlikda tezkor tadbir o‘tkazilgan. Tadbir davomida fuqaro I.T. 300 dollarni pora tariqasida YPX xodimiga bergan vaqtida ushlangan. Pullar xolislar ishtirokida daliliy ashyo tariqasida rasmiylashtirib olingan.
Mazkur holat yuzasidan tergovga qadar tekshiruv harakatlari olib borilmoqda.
Izoh (0)